1. ‘Aua ‘e te fai le leaga, ‘ona lē o‘otia fo‘i lea o oe i ni leaga.
2. ‘Ia e ‘alo ‘ese i le amio leaga, ‘ona fa‘amamao lea ‘iā te oe o mea leaga.
3. Lo‘u atali‘i e,‘aua ‘e te lūlū fua leaga i suataga o le amioletonu,‘ina ne‘i e seleseleina o lona sautuafitu.
4. ‘Aua ‘e te tagi atu i le Atua i sau pule‘aga,pe tagi atu i le tupu i sou nofoāli‘i.
5. ‘Aua ‘e te fa‘afiaamiotonu i luma o le Atua,auā o ia e silasila i le loto, ‘aua fo‘i ‘e te fa‘afiapoto i luma o le tupu.
6. ‘Aua ‘e te tauivi atu i le tofiga o le fa‘amasino,‘ina ne‘i lē lava lou malosi i le vavao le amio leaga,‘ina ne‘i e pala‘ai i luma o le tagata mamalu,e ‘avea ai lea mea ma ma‘a e tautevateva ai lou amiotonu.
7. ‘Aua ‘e te fa‘atigā i le ‘a‘ai ‘atoa,‘aua fo‘i ‘e te fa‘afialelei i le motu o tagata.
8. ‘Aua fo‘i ‘e te fa‘amau fa‘alua lau amio leaga,auā e o‘o lava i sau agasala e tasi, ‘e te lē sao ai i le sala.
9. ‘Aua ‘e te loto vaivai i mea ‘ua e fa‘atoga atu,
10. ‘aua fo‘i ‘e te tu‘ulafoa‘iina le tatalo ma le faiga o mea alofa.
11. ‘Aua ‘e te fa‘apea ifo,“E silasila mai le Atua i le tele o a‘u mea alofaa ‘ou momoli atu a‘u mea alofa i le Atua Silisili‘ese, e talileleia lava e ia.”
12. ‘Aua ‘e te tauemu i le tagata ‘ua momomo lona loto,auā e silasila mai lava le Atua;o ia lē na te fa‘amaulaloina,o ia fo‘i lē na te fa‘amamaluina.
13. ‘Aua ‘e te fatufua ni talapepelo e leaga a‘i o ou uso,e fa‘apea fo‘i ma au uō.
14. ‘Ia oe lava ma le tala pepelo, auā o le talapelo,o le masani leaga lava lea.
15. ‘Aua ‘e te so‘ona tautalatala i le fa‘apotopotoga o ē toeaina,‘aua fo‘i ‘e te fa‘aluaina se ‘upu a lau tatalo.
16. ‘Aua ‘e te ‘ino‘ino i galuega faigatā,‘ae maise o le fa‘ato‘a o le ‘ele‘ele na poloa‘iina e le Silisili‘ese.
17. ‘Aua le faitauina oe fa‘atasi ma le vao tagata solitulafono.
18. ‘Ia e manatua le to‘asā, auā e lē fa‘atuai mai.
19. ‘Ia e matuā fa‘amaulalo lou loto,auā o le afi ma le ilo e fa‘asalaina a‘i le tino o le tagata amio leaga.
20. ‘Aua le tu‘ulafoa‘i i lau uō ‘ona ‘ua fa‘atuai le toe fa‘aola mai o se tupe,‘aua fo‘i ‘e te tauemu i sou uso pele ‘ona o sina auro.
21. ‘Aua ‘e te fa‘ate‘a le avā mafaufau ma le amio lelei ‘ua fai mou tofi i le mata‘u i le Ali‘i,auā e sili i le auro le tāua o lona lālelei.
22. ‘Aua ‘e te fa‘asaunoa i le pologa ‘ua galue ma le fa‘amaoni,po o lau ‘au‘auna ‘ua fa‘aaogā mo oe lona malosi.
23. A i ai sou pologa atamai, ‘ia e alofa ‘iā te ia e pei ‘ona e alofa ‘iā te oe,‘aua le tāofiofi lona fa‘asa‘olotoina, ‘aua fo‘i ‘e te tu‘ulafoa‘i i lona mativa.
24. A i ai sau lafumanu, ‘ia e to‘aga i ai;a aogā fo‘i o nai manu ‘iā te oe, ‘ia e tāofi pea i lou ‘āiga.
25. A i ai ni ou atali‘i, ‘ia e a‘oa‘o atu ‘iā te i latou,ma ‘ia gau la latou amio e āfua mai ‘ina laiti.
26. E i ai ni ou afafine? ‘Ia e tausi lelei i o latou tino,‘aua fo‘i ‘e te fai anaga i o latou luma.
27. A e maua se fa‘aipoipoga mo lou afafine,‘ua e faia sau galuega aogā tele; ‘ia e tu‘u lou afafine i se tane fa‘autauta.
28. ‘Āfai ‘ua e maua sau avā e tusa ma lou loto,‘aua ‘e te fa‘ate‘aina; ‘aua fo‘i ‘e te fa‘alagolago i se fafine ‘ua lē feagai ma oe.
29. ‘Ia e āva i lou tamā ma lou loto ‘atoa,‘aua ne‘i galo fo‘i ‘iā te oe le mapuitigā o lou tinā.
30. ‘Ia e manatua o i lā‘ua lava ia na ala ai ‘ona fānau mai o oe,ma ‘ia e toe taui atu ‘iā te i lā‘ua e tusa ma mea na la faia ‘iā te oe.
31. ‘Ia e mata‘u i le Ali‘i ma lou loto ‘atoa ma ‘ia e fa‘aaloalo i ana ositaulaga pa‘ia.
32. ‘Ia e alofa ma lou malosi ‘atoa i lē na ia faia oe,‘aua fo‘i ‘e te tu‘ulafoa‘i i ana ‘au‘auna.
33. ‘Ia e āva i le Atua ma lou loto ‘atoa,‘ia e fa‘aaloalo i ositaulaga ma ‘aua le tāofia e oe o a latou tufa‘aga.
34. ‘Ia e tu‘u atu ‘iā te i latou, e tusa ma le tulafono,le tufa‘aga o mea fa‘apolopolo ma taulaga mo le agasalama nai mea alofa e fa‘ato‘ese ai mo lou fa‘atamala.
35. ‘Ia e momoli atu i le Ali‘i le mea alofa o ‘alaga,ma le taulaga togiola ma mea fa‘apolopolo mo tagata pa‘ia.
36. ‘Ia e tu‘u atu fo‘i lou lima i le tagata mativa,‘ina ‘ia ‘ato‘atoa ai ‘ona lelei lau fa‘ato‘esega ma lou fa‘amanuiaga.
37. ‘Ia e mataalofa i mea ‘e te foa‘i atu i ē uma o lo‘o ola,‘aua fo‘i ‘e te fa‘afiti i sau mea alofa i lē ‘ua oti.
38. ‘Ia e to‘aga e fa‘amafanafana i ē fētāgisi ma ‘ia e savali i tafatafa o lē ‘ua fa‘anoanoa.
39. ‘Aua ne‘i e fa‘atalalē i le asiasi i ē mama‘i,auā o amioga ia e fa‘amausalīina ai oe i le alofa.
40. ‘Ia e manatua o lou i‘uga i au galuega uma lava,‘ona e lē agasala ai lea e o‘o i le fa‘avavau.