1. ‘Aua ne‘i ‘avea oe ma fili o lē sa lua‘i fa‘auō ma oe; auā o le tofi o le tagata leaga,o le māsiasi ma le tauemuga; e fa‘apea o le tagata agasala ‘ua matau‘a o ia ma le fa‘agutugutulua.
2. ‘Aua ‘e te fia sili i mafaufauga o lou loto,e pei o se povi po‘a, ne‘i gauia lou malosi ‘ona o lou valea;
3. na te ‘ai i ou lau, fa‘aleaga ou fua,‘ona tu‘ua lea o oe e pei o se la‘au mate i le fanua tu‘ufua.
4. Auā o lē ‘ua i ai le loto leaga, e lepetia a‘i o ia,e tu‘uina ai o ia e fai ma ulaga i ona fili ma ta‘ita‘iina ai i le i‘uga o ē amio leaga.
5. O le ‘upu agamalū e fa‘ato‘ateleina ai au uō ma fa‘afilemūina a‘i ou fili;o le laulaufaiva o le tagata amio lelei e faula‘i i ai le ‘upu malie.
6. ‘Ia to‘atele nisi ē fealofani ma oe,a ‘ia to‘atasi mai le to‘aafe o ē pulega fa‘atasi ma oe.
7. ‘Āfai ‘e te fia fai sau uō, ‘ia e fa‘auō i ai pe a uma ‘ona tofotofoina,‘aua fo‘i ‘e te fa‘atuatua vave na‘uā ‘iā te ia.
8. Auā o le tasi e fa‘auō fa‘aitulā,‘ae te‘a ‘ese o ia i le aso o le puapuagā.
9. ‘Ua i ai ma le uō e liliu o ia e fai mou fili ma le uō na te talaina le ‘ino‘ino,o māseiga ma fe‘upua‘iga na tupu i lo ‘oulua vā.
10. E fa‘auō le tasi pe a fa‘atasi ma oe i lou la‘o‘ai,‘ae ‘alo ‘ese o ia i le aso o le puapuagā.
11. A fa‘amaoni ‘iā te oe lau uō, e ‘avea o ia o sē lua te tutusa,e fa‘afeagai fo‘i o ia ma lou ‘au ‘āiga e pei o sē masani.
12. ‘Āfai ‘ua fa‘amaulalo o ia ‘iā te oe ma ‘ua ta‘ufa‘atauva‘a ‘iā te ia lava i ou luma,‘ona e maua ai lea se fealofani ‘ua matuā lelei.
13. ‘Ia e ‘alo ‘ese i ou fili ma ‘ia e fa‘aeteete i au uō.
14. O le uō moni, o le puipui malosi lea;o lē ‘ua na maua, ‘ua maua e ia le tu‘ugā‘oloa.
15. E leai se mea e mafa‘atusaina ma le uō fa‘amaoni,e lē tusa fo‘i se fa‘aputuga auro po o se fa‘aputuga ario e fa‘atatau ma le lelei o lona fa‘amaoni.
16. O le uō fa‘amaoni, o le vaila‘au lea e maua ai le malosi ma le ola e fa‘avavau,‘ae maua lava e i latou e matata‘u i le Ali‘i.
17. O lē mata‘u i le Atua, e maua ai e ia le fa‘auō lelei,auā e tusa fo‘i lana uō ma ia.
18. Lo‘u atali‘i e, ‘ia e tali le a‘oa‘oga talu lava lou la‘itiiti,‘ona e maua ai lea le poto se‘ia o‘o ‘ina e ulusinā.
19. ‘Ia e fa‘alatalata atu i ai e pei o sē na te suatia le ‘ele‘ele ma lūlū le saito;‘ia e fa‘atalitali fo‘i i ona fua lelei.
20. E itiiti nai aso ‘e te tigāina e galue i ai,‘ae vave lava ‘ona e ‘ai i ona fua.
21. E matuā faigatā tele le poto i tagata ‘ua lē a‘oa‘oina,e lē tumau fo‘i i ai le tagata valea.
22. E ‘avea le poto e pei o le ma‘a mamafa e tofotofoina ai,e lē pine ‘ona ia lafoa‘iina.
23. Auā o le poto ‘ua a‘oa‘oina ai, ‘ua tusa ia ma lona igoa,e lilo lava ia i le to‘atele; a o ē iloa ia, ‘ua tumau o ia fa‘atasi ma i latou e o‘o atu i luma o le Atua.
24. Lo‘u atali‘i e, ‘ia e fa‘alogo mai, ‘ia e tali i lo‘u nei mafaufauga,‘aua fo‘i ‘e te tu‘ulafoa‘i la‘u a‘oa‘iga.
25. ‘Ia e tu‘utu‘u ou vae i ona noanoaga ma lou ua i lona asoa.
26. ‘Ia e tu‘u ifo ou tau‘au ma e amoina ia, ‘aua ‘e te ita i ona noataga.
27. ‘Ia e fa‘alatalata atu i ai ma lou loto ‘atoa,‘ia e tausi fo‘i i ona ala ma lou malosi ‘atoa lava.
28. ‘Ia e alofa i ai, ‘ona fa‘aalia ai lea ‘iā te oe; ‘ae maua fo‘i o ia,‘aua ‘e te te‘a ‘ese ma ia.
29. Auā e i‘u ‘ina e maua ai lou mapusaga, e liliu o ia ma ‘oli‘oli ‘iā te oe.
30. E ‘avea ona noanoaga e fai ma puipui malosi ‘iā te oe ma se lagolago mau,a o ona asoa e liua i se teuga mamalu;
31. auā o lo‘o ‘iā te ia le matagofie o le ola,a o ona noataga o fusiga e fa‘aolaina a‘i.
32. ‘E te fa‘a‘ofu ai e pei o se ‘ofu mamalu,‘e te fa‘ae‘etia fo‘i i lou ulu, e pei o le pale o le ‘oli‘oli.
33. Lo‘u atali‘i e, ‘āfai ‘e te to‘aga mai ‘iā te a‘u, e a‘oa‘oina ai oe;‘āfai e filigā lou loto, ‘e te maua ai le poto.
34. ‘Āfai ‘e te ua‘i mai ou taliga, ‘e te tali ai le a‘oa‘oga;‘āfai fo‘i ‘e te fia fa‘alogo pea, ‘e te poto ai.
35. ‘Ia e tu fa‘atasi ma le fa‘apotopotoga o toeaina fa‘autauta,‘ia ‘auai lou loto i lo latou poto,‘ina ‘ia mafai ai ‘ona e fa‘alogo i fa‘amatalaga uma e uiga i le Atua,‘ona lē lilo fo‘i lea ‘iā te oe le malie o a latou fa‘ata‘oto.
36. A e iloa atu se tagata mafaufau,‘ia e alausu lava ‘iā te ia;ma ‘ia ‘āia i lau savali so‘o i ai, le paepae i luma o lona faitoto‘a.
37. ‘Ia tumau lou mafaufau i poloa‘iga a le Atua ma ‘ia e saga mafaufau pea i ana tulafono,‘ona fa‘amalosia ai lea e le Atua lou loto,e foa‘iina mai ‘iā te oe le poto ‘ua e naunau i ai. #