17. O le mea lea ‘ou te vivi‘i atu aima ‘ou fa‘ane‘ene‘e ai ‘iā te oe,‘ou te fa‘amanū i le suafa o le Ali‘i.
18. O aso a ‘ou taule‘ale‘a, a o le‘i amata ‘ona ‘ou ta‘asē,‘ua ‘ou fa‘aalia la‘u sā‘ili i le poto i a‘u talosaga.
19. Na ‘ou tagi atu ai i luma o le malumalu,‘ou te sā‘ili fo‘i i ai e o‘o i le i‘uga ma ‘ua fua mai e pei o se fuifuivine taumūmū mai.
20. ‘Ua ‘oli‘oli i ai o lo‘u loto, ‘ua sāvavali o‘u vae i le ala tonu,‘ua ‘ou sā‘ili lava i ai e āfua mai i lo‘u taule‘ale‘a.
21. Na ‘ou ua‘i teisi o lo‘u taliga ma ‘ua ‘ou talia lava ia.
22. ‘Ua ‘ou maua i lo‘u loto le poto matuā tele ma ‘ua tele ai lo‘u alualu i luma.
23. ‘Ou te fa‘ane‘ene‘e atu i lē ‘ua na foa‘i mai le poto,
24. auā ‘ua tonu ‘iā te a‘u ‘ou te fa‘aaogāina.‘Ua ‘ou tauivi ai i le amio lelei, ‘ou te lē māsiasi ai lava.
25. ‘Ua tau le tau‘a e lo‘u agaga ‘ia maua le poto,‘ua fa‘amalosi fo‘i i le tausi i ai.
26. Na ‘ou si‘i o‘u lima i le lagi, ‘ua ‘ou fa‘anoanoa ‘ona ‘ua lē āu iloa o ia.
27. ‘Ua ‘ou fa‘asaga tonu lo‘u loto ‘iā te ia, ‘ona ‘ou maua lea ma iloa atu o ia.
28. Talu mai le amataga ‘ua ‘ou pulea lo‘u loto ‘ona o ia, o le mea fo‘i lea e lē tu‘ulafoa‘iina ai a‘u.
29. Sa naunau lo‘u loto i le sā‘ili‘ili ‘iā te ia,o le mea lea ‘ua ‘ou mauaina se tu‘ugā‘oa tāua.
30. ‘Ua tu‘u mai e le Ali‘i lo‘u taui, o le laulaufaiva ‘ou te vivi‘i atu ai ‘iā te ia.
31. ‘Ia ‘outou fa‘alatalata mai ‘iā te a‘u, o ‘outou o ē vālelea,‘ia fa‘apotopoto ‘outou i le fale o le a‘oa‘oga.
32. Se ā le mea ‘ua ‘outou fa‘atuai ai?Se ā se ‘upu ‘ua ‘outou faia ai?‘Ua matuā gālala o ‘outou agaga.
33. ‘Ua matala mai ou laugutu, ‘ua ‘ou tautala ai.‘Ia ‘outou fa‘atau ma le leai se tupe e totogi a‘i,
34. ma ‘ia tu‘uina o ‘outou ‘ua i lalo o le amo ma ‘ia talia lea a‘oa‘oga e o ‘outou agaga,auā e lē aogā ‘ona ō mamao i le maua ai.
35. ‘Ia va‘ava‘ai mai o ‘outou mata ‘ua itiiti si ‘ou tautigā,a ‘ua ‘ou maua mai ai le mapusaga tele!
36. ‘Ia ‘outou talia le a‘oa‘oga i le tele o tupe ario,ma ‘ia ‘outou maua mai ai le auro e tele anoanoa‘i.
37. ‘Ia ‘oli‘oli o ‘outou agaga i lona agaalofa,e lē māsiasi lava ‘outou i le vivi‘i atu ‘iā te ia.