1. Na alofagia o Mose e le Atua ‘atoa ma tagata;o le fa‘amanatuina o ia, e vi‘ia lava lea.
2. ‘Ua na fa‘atusaina o ia ma le ‘au pa‘ia i le mamalu,‘ua na fa‘asilisili o ia i le fa‘amata‘u i ona fili,ma ‘ua na fa‘agataina o vāvega i ana ‘upu.
3. ‘Ua na fa‘amamaluina o ia i luma o tupu,na tu‘u atu ‘iā te ia ana poloa‘iga i luma o lona nu‘u,ma ‘ua fa‘aali mai ‘iā te ia lona ia mamalu.
4. ‘Ua na fa‘apa‘ia ‘iā te ia ‘ona o lona fa‘atuatua ma lona agamalū,‘ua na filifilia ia a‘i tagata uma lava;
5. ‘ua na fa‘ao‘o mai ‘iā te ia lona si‘ufofogama ‘ua na ta‘ita‘iina o ia i totonu o le ao;
6. na fa‘afesaga‘i ai o i lā‘ua, ‘ua tu‘u mai ‘iā te ia o ana poloa‘iga,o le tulafono o le ola ma le amiotonu,‘ina ‘ia a‘oa‘o atu ‘iā Iakopo lana feagaiga,o ana fa‘amasinoga fo‘i ‘iā Isaraelu.
7. ‘Ua na fa‘aea fo‘i o Arona, o lona uso, a‘i le itū‘āiga o Levi,‘ua tutusa i lā‘ua.
8. ‘Ua na osi ma ia le feagaiga e fa‘avavau,‘ua na tu‘u mai ‘iā te ia le tofiga o ositaulaga o le nu‘u,ma ‘ua na fa‘amanuiaina ia i lona lava mamalu.
9. ‘Ua na fusi ‘iā te ia i le fusi o le mamalu,‘ua na fa‘a‘ofu ‘iā te ia i le ‘ofu o le mamalu ma ‘ua fa‘apale ‘iā te ia i fa‘ailoga o le mana.
10. ‘Ua na tu‘u mai ‘iā te ia le ‘ofu talaloa, o ‘ofu vae, o le efota;ma ‘ua na tu‘u mai o tagitagi auro e tele lava e fa‘ata‘ali‘oli‘o ‘iā te ia,
11. e tagitagi i lana savali, ‘ina ‘ia lagona lona tagitagi i le malumaluma manatua ai le fānau a lona nu‘u;
12. o le ‘ofutino pa‘ia ‘ua faia i le auro ma le ‘ie uli ma le pāuli,o le ufifatafata o le fa‘amasinoga e i ai le malamalama ma le amiotonu,
13. ‘ua gaosia i le ‘ie mūmū ‘ua milo ona manoa,o le galuega lava a le tagata poto;o ma‘a tāua fa‘amaufa‘ailoga i le fa‘ava‘a auro,o le galuega a le tufuga togi ma‘a tāua,e fai ma fa‘amanatu e tusa ma le numera o itū‘āiga o Isaraelu;
14. o le pale auro ‘ua i luga o lona pulou ‘ie ‘ua tusia ai le fa‘ailoga o le PA‘IA;o le mamalu o le vi‘iga, o le galuega tāua o le teuga e fa‘a‘oli‘oli a‘i o mata;
15. e le‘i faia muamua ‘iā te ia, talu mai aso o le vavau,o ni teu e fa‘apea ‘ona lelei;
16. e le‘i ‘ofu ai lava se tagata ‘ese e tasi,a ‘ua na o ona lava atali‘i ma atali‘i o ona atali‘i e o‘o i le fa‘avavau;
17. o aso ta‘itasi uma ‘ua mū ai i le afi o ana taulaga.
18. Na fa‘asā e Mose ona alofilima, ‘ua na fa‘au‘u ‘iā te ia i le suāu‘u pa‘ia.
19. ‘Ua ‘avea ma feagaiga e fa‘avavau mo ia ma lana fānau,a o tūtūmau pea aso o le lagi, o le tofiga o ositaulaga, o le vivi‘i atu i le Atua,ma le fa‘amanuia i lona nu‘u i lona suafa.
20. ‘Ua na filifilia o ia i tagata uma lava e momoli le taulaga i le Atua,ma le mea manogi e mū, ma le mea namu lelei,e fa‘amanatu ai i le nu‘u, e fai mōna togiola.
21. Na ia tu‘u mai ‘iā te ia le pule i ana poloa‘iga, i fa‘amasinoga o ana tulafono,‘ina ‘ia a‘oa‘o atu ai ana poloa‘iga ‘iā Iakopo ma fa‘amalamalama ana tulafono ‘iā Isaraelu.
22. ‘Ua tutū o tagata ‘ese e tete‘e atu ‘iā te ia,‘ua latou sisi‘o ‘iā te ia i le fanua tu‘ufua ‘ona o lo latou matau‘a,o ē sa ‘au ‘iā Tatano ma Apiramo, o le ‘au‘āiga o Koru i lo latou ita.
23. ‘Ua silasila i ai le Atua, ‘ua lē malie ai lona finagaloma ‘ua fa‘aumatia i latou i le ‘a‘asa o lona to‘asā;
24. ‘ua faia e ia le vāvega ‘iā te i latou, ‘ua na fa‘aumatia latou i le afi mū.
25. Ma ‘ua na fa‘ateleina le mamalu o Arona, ‘ua na foa‘i mai ‘iā te ia le tofi,‘ua vavae‘eseina mo ia o fa‘apolopolo o fua o le lau‘ele‘ele.
26. ‘Ua mua‘i saunia mo i latou o mea e ‘ai latou te mā‘o‘ona ai, auā e ‘a‘ai fo‘i i latou i taulaga o le Ali‘i, ‘ua na foa‘iina mai ‘iā te ia ma lona gafa.
27. ‘Ae le faia sona fanua i le lau‘ele‘ele o le nu‘u, e leai sona tofi i totonu o Isaraelu;auā o ia lava o lona fanua ma lona tofi.
28. O Fineaso, le atali‘i o Eleasaro, ‘ua pito ane ‘iā i lā‘ua nā i le mamalu,o fa‘aa‘oa‘o lava ‘iā Arona i le mata‘u i le Ali‘i.
29. ‘Ua mautū lava ia ‘ina ‘ua tu‘umuli le nu‘u;‘ua fai ma puluvaga i le Atua mo Isaraelu i le fa‘amaoni ma le fiafia o lona agaga.
30. O le mea lea na fa‘amauina ai ‘iā te ia le feagaiga o le fa‘amanuiaga,‘ua faia o ia ma pule o le mea pa‘ia ‘atoa ma le nu‘u,‘ia ‘iā te ia ma lona gafa le tofiga mamalu o le ositaulaga e o‘o i le fa‘avavau,
31. e pei o Tavita, le atali‘i o Iese, o le itū‘āiga o Iuta,‘ua fa‘asolo ifo i lona gafa le tofi o le tupu;‘ia tu‘u mai le poto i o tatou loto,‘ina ‘ia fa‘amausalīina le amiotonu i lona nu‘u,e fa‘atumauina ai fa‘amanuiaga na ia foa‘iina mai;i le o lenei tulaga mamalu i lo latou nu‘u ‘ua na fa‘atō atu ‘iā te i latou e o‘o i le fa‘avavau.