1. Lo‘u atali‘i e, ‘aua ‘e te fa‘afiti ‘ona avatu le mea alofa i lē ‘ua mativa,‘aua ne‘i ‘alo ‘ese ou mata i lē ‘ua tigāina.
2. ‘Aua ‘e te fa‘atigā i le loto o lē ‘ua fia ‘ai,‘aua fo‘i ‘e te fa‘a‘ono‘ono i le tagata mativa i lona puapuagā.
3. ‘Aua ‘e te fa‘ataugā i le loto o lē ‘ua puapuagātia,‘aua ‘e te fa‘atuai ‘ona foa‘i atu i lē ‘ua tigāina.
4. ‘Aua ‘e te te‘ena le tagi a lē ‘ua puapuagātia,‘aua fo‘i le ‘alo ‘ese ou mata i le tagata mativa.
5. ‘Aua ne‘i ‘alo ‘ese ou mata i lē ‘ua puapuagāina, ‘ina ne‘i ita ai o ia;‘āfai na ole mai ‘iā te oe, ‘aua ‘e te tu‘u atu i ai se ala e fetu‘u ai ‘iā te oe i ou tua.
6. Auā ‘āfai ‘ua na fetu‘u ‘iā te oe i le tigā o lona loto, e talia lava lana tagi,e fa‘afofogaina o ia e lē ‘ua na faia o ia.
7. ‘Ia e mata fiafia i le fa‘apotopotoga o ē matitiva;‘ia e faulalo lou loto i luma o le toeaina ma ‘ia punou lou ulu i luma o lē mamalu.
8. ‘Ia ua‘i atu ou taliga ma le loto lelei i le tagata mativa,‘ia e avatu ‘iā te ia le mea e tatau ai ma ‘ia e tali atu ‘iā te ia ma le agamalū i ni ‘upu fa‘afiafia.
9. ‘Ia e lavea‘i i lē ‘ua puapuagātia mai le lima o le tagata fa‘amaualuga,‘aua fo‘i le ‘o‘ona lou loto pe ā fai au fa‘amasinoga.
10. ‘Ia e agaalofa, e pei o se tamā, i ē matua oti,‘ia pei o se to‘alua oe mo lo latou tinā,
11. e ‘avea ai oe e pei o se atali‘i usita‘igofie o le Silisili‘ese,e sili ai lona alofa ‘iā te oe i lo lou tinā.
12. O le poto, e manava atu o ia i lana fānau le mānavaga ola,e talia fo‘i e ia o i latou e sā‘ili ‘iā te ia,e muamua ‘iā te i latou i le ala o le amiotonu.
13. O lē naunau ‘iā te ia, e naunau o ia i le ola;o ē alausu ‘iā te ia, e ‘oli‘oli i latou i lona agamālie.
14. O ē fufusi ‘iā te ia, latou te mau tofi i le ola,e fa‘amanuia e le Atua mea uma e ulufale ai o i latou.
15. O ē ‘au‘auna atu ‘iā te ia, e ‘au‘auna i latou i lē ‘ua pa‘ia;o ē alolofa ‘iā te ia, e alofagia i latou e le Atua.
16. O lē fa‘alogo ‘iā te ia, e fa‘amasino o ia i nu‘u ‘ese;o lē tepa ‘iā te ia, e mautū ai o ia ma le saogalemū.
17. O lē fa‘alagolago i le poto e mau tofi lava i ai o ia,e fa‘amausalīina ai fo‘i o lana fānau,
18. auā e savali fa‘atasi ma ia i le tofotofoga ma ‘ua mua‘i filifili ‘iā te ia.
19. Na te fa‘atupu i lona loto le fefe ma le mata‘u ma le fa‘aosoosoga,na te fa‘atigā ‘iā te ia i le ala faigatā o lana a‘oa‘oga,se‘ia o‘o ‘ina su‘esu‘eina e ia ona manatu ma ‘ua fa‘atuatua i ai o lona agaga.
20. ‘Ona fa‘amausalī ai lea ‘iā te ia ma fa‘afetaia‘i ‘iā te ia i le ala tonu ma fa‘afiafia ai ‘iā te ia.
21. Na te fa‘aali tino ‘iā te ia o ana ‘upu lilo ma fa‘aputu i lona loto ‘oloa o le poto ma le malamalama o le amiotonu.
22. Peita‘i, ‘āfai ‘ua savali sesē le tagata, e tu‘ulafoa‘iina o ia e le poto,‘ae tu‘uina o ia i lima o lona fili.
23. ‘Ia e fa‘aaogāina o itū aso uma ma ‘ia e ‘alo ‘ese i le leaga.
24. ‘Aua ‘e te mā i tautala i le ‘upu moni, ‘ina ‘ia lelei ai lou agaga.
25. Auā e i ai le māsiasi e tupu a‘i le agasala;e i ai ma le māsiasi e tupu a‘i le mamalu ma le ta‘uleleia.
26. ‘Aua ‘e te fa‘ailogaina se tagata, ne‘i tupu ai se faigatā mo lou agaga,‘aua fo‘i ‘e te tala pepelo ne‘i leaga ai lou atamai.
27. ‘Aua ‘e te poipoi i lou uso pe ‘āfai ‘ua agasala o ia.
28. ‘Aua fo‘i ‘e te manumanu i sau ‘upu i le itū aso e aogā ai ‘iā te ia.‘Aua ‘e te nanā lou poto i lona matagofie.
29. Auā e ‘iloga le poto i le tautala; ‘ua aliali le mau manatu ma le atamai ma le a‘oa‘oga i le ‘upu a le tagata mafaufau,e aliali le loto malosi i galuega o le amiotonu.
30. ‘Aua lava ‘e te ‘upu ‘ese i le mea moni,a ‘ia e māsiasi i le ‘upu pepelo ‘ua e faia i lou valea.
31. ‘Aua ‘e te mā i ta‘uta‘u au agasala, ‘aua fo‘i ‘e te agasala ‘ona o le fia usita‘i i se tasi.
32. ‘Aua ‘e te fa‘afiti ‘ona fa‘aaloalo i le tagata mamalu,‘aua ‘e te fia malō i le vai ‘ua tafe malosi.
33. ‘Ia e puipui i le amiotonu, ‘ina ‘ia sao ai lou agaga;‘ia e tau le tau‘a mo le amio tonu se‘ia o‘o i le oti;‘ona tau ai lea le Atua mo oe ma fa‘ato‘ilalo ou fili.
34. ‘Aua ‘e te ta‘alise i lau tautala, ‘ae paiē ma le fa‘atalalē i au amioga.
35. ‘Aua le ‘avea oe e pei o se leona i totonu o lou ‘āiga,o fa‘asapisapi i lou ‘au‘āiga ma fa‘asauā ‘iā i latou e i lalo o lau pule.
36. ‘Aua le lima fālō i le fia maua mai, ‘ae limavale i le foa‘i atu. #