1. O le fānau a le poto, o le fa‘apotopotoga lea o ē amiotonu,o le fānauga lea o le usita‘i ma le agaalofa.
2. Lo‘u atali‘i e,‘ia e fa‘alogo i le poloa‘iga a lou tamā ma ‘ia ‘outou tauivi ‘ina ‘ia maua ai le fa‘aolataga.
3. Auā ‘ua fa‘amamaluina le tamā e le Atua i luma o lana fānau;ma ‘ua na fa‘amamaluina le pule a le tinā i luga o ana tama.
4. O lē alofa i le Atua e fa‘ato‘ese o ia ‘ona o ana agasala, e ‘alo ‘ese fo‘i i ai o ia,‘ona fa‘afofogaina lea i aso uma e tatalo atu ai o ia.
5. O lē āva i lona tinā, ‘ua pei o lē fa‘aputuputu se tu‘ugā‘oloa.
6. O lē āva i lona tamā e manuia lava ia i lana fānau,e fa‘afofogaina fo‘i o ia i le aso e tatalo ai o ia.
7. O lē āva i lona tamā, e fa‘afualoa lona olaga,a o lē usita‘i i lona tamā na te fa‘amaise ai i lona tinā.
8. O lē mata‘u i le Ali‘i, e āva o ia i ona mātua,na te ‘au‘auna fo‘i i ona tupuga e pei o le tautua i ona matai.
9. ‘Ia e āva i lou tamā i au amioga ma au ‘upu, ma le ‘onosa‘i tele,
10. ‘ina ‘ia o‘o mai ‘iā te oe lana fa‘amanuiaga ma ‘ia tumau lana fa‘amanuiaga e o‘o i le gata‘aga.
11. O le fa‘amanuiaga a le tamā e fa‘amausalīina ai o fale o ona atali‘i,a o le fetu‘u a le tinā e lepetia ai e o‘o i le fa‘avae.
12. ‘Aua ne‘i e mimita i le tauemuina o lou tamā;auā o lona māsiasi e lē o se mamalu lea mo oe.
13. Auā o le mamalu o le tagata e pogai lea i le ta‘uleleia o lona tamā,i le o le tamā ‘ua ta‘uleagaina o le māsiasi lea o lona atali‘i.
14. Lo‘u atali‘i e, ‘ia e tausi i lou tamā pe a toeaina o ia,‘aua fo‘i ‘e te fa‘a‘ono‘ono ‘iā te ia i aso o lona olaga.
15. ‘Āfai fo‘i e valevalematua, ‘ia e ‘onosa‘i ‘iā te ia, ‘aua fo‘i ‘e te tauemu i ai i le malosi o lou tino;auā e lē fa‘agalogaloina le agalelei o le tagata i lona tamā,
16. e tauia fo‘i le ‘onosa‘i i pona o le tinā;
17. o le amiotonu e atiina a‘e ai lou fale, e manatua ai fo‘i oe i le aso o le puapuagā,e tineia ai fo‘i o au agasala, e pei ‘ona liusuāvai le vaito‘a i aso mafanafana.
18. E matuā ta‘uleagaina le tagata ‘ua tu‘ulafoa‘i i lona tamā;e fetu‘uina fo‘i e le Atua lē fa‘a‘ono‘ono i lona tinā.
19. Lo‘u atali‘i e, ‘ia e fai au galuega ma le agamalū,‘ona alofagia ai lea o oe e tagata e vivi‘i atu ‘iā te oe.
20. ‘Āfai ‘ua sili lou mamalu, ‘ia atili ai lava ‘ona e fa‘amaulalo,‘ona alofagia mai lea o oe e le Atua;
21. auā, ‘ua na o le Atua e tele lona mana ma ‘ua vi‘ia lava ‘ia e tagata fa‘amaulalo.
22. ‘Aua ‘e te su‘esu‘e i mea ‘ua lē au i ai lou mafaufau, ‘aua fo‘i ‘e te fia iloa o mea ‘ua e lē lavātia;a o mea ‘ua poloa‘i mai e le Atua ‘iā te oe, o mea lava ia ‘ia e mafaufau pea i ai,‘ae ‘aua ‘e te fia iloa ana galuega uma lava.
23. Auā e lē aogā ‘iā te oe ‘ona e matamata i mea ‘ua lilo.
24. ‘Aua ‘e te saga su‘esu‘e i mea ‘ua lē aogā ‘iā te oe,‘aua fo‘i ‘e te fia iloa le tele o galuega a le Atua.
25. Auā ‘ua fa‘aalia lava ‘iā te oe o mea e tele e lē āu i ai le mafaufau o le tagata;
26. ‘ua fa‘asesēina nisi e to‘atele i o latou lava tāofi fa‘avaleama ‘ua maileia i latou i mea fa‘atauva‘a ‘ona o o latou manatuga.
27. E pagātia i aso amulī le tagata loto ma‘a‘a; a o lē fiafia i mea e tutupu a‘i mala,e i‘u lava ‘ina fano ai o ia.
28. O le loto o lē ulu atu i ala e lua, e lē fa‘amanuiaina ia, a o le loto leaga e pa‘ū ai fo‘i o ia.
29. E mafatia i puapuagā le tagata loto ma‘a‘a,e pei o le tagata amio leaga na te fa‘aopoopo le agasala i le agasala.
30. E leai se olataga mo le fa‘apotopotoga o ē fa‘amaualuga,auā e maua‘a i o latou loto le la‘au o le agasala, a ‘ua lē lagona e i latou.
31. O le amiotonu e iloa a‘i lē ‘ua i ai le poto;o le taliga o lē ‘ua amio lelei e fa‘alogo i ‘upu o le poto ma le fiafia tele.
32. O le tagata poto ma le atamai e ‘alo ‘ese o ia i le agasala ma ‘ua manuia o ia i galuega o le amiotonu.
33. O le vai e tineia a‘i le afi mū, a o le fai mea alofa e tineia a‘i agasala.
34. O le Atua fo‘i na te toe taui atu i lē ‘ua fai mea alofa,na te manatua o ia i aso amulī; o ona po e fa‘alavelaveina ai o ia,e maua e ia se lagolago malosi.