1. O le tagata agaalofa e nō atu o ia i lē la te tuā‘oi;o lē lima lelei, ‘ua tausi o ia i poloa‘iga.
2. ‘Ia e nō atu i lē lua te tuā‘oi i aso o lona puapuagā;‘ae toe fa‘aola atu fo‘i i lē lua te tuā‘oi pe a o‘o i aso ‘ua tu‘upoina.
3. ‘Ia e tausia lau folafolaga, ‘ia e fa‘amaoni ‘iā te ia,‘ona e maua ai lea i aso uma o mea e aogā ‘iā te oe.
4. E manatu ni isi e to‘atele o le mea maua fua le mea ‘ua nō mai ‘iā te i latou,ma ‘ua latou fa‘atigā ai i ē na fesoasoani mai ‘iā te i latou.
5. A o le‘i talia mai, ‘ua latou feasogi i le lima o le uso,‘ua latou fai folafolaga ma le faulalo le leo;
6. ‘ae a o‘o i aso e fa‘aolaina ai le mea, ‘ona tagi mai lea ia tolo i tua le aso,‘ua fa‘aali mai lo latou tigāina, ‘ua muimui ma ta‘uta‘u mai le faigatā o aso nei.
7. ‘Ae mafai ‘ona fa‘aola mai, e fai lava ma le musuā, pe na o le vaeluaga e fa‘aolaina i le uso,‘ae manatu ifo o ia o le mea maua lava lea.
8. ‘Ae a lē mafai, e maumau ‘iā te ia lana tupe,e ‘avea fua fo‘i mōna fili le tagata na ia alofa atu i ai.
9. Na te taui mai ‘iā te ia i ni palauvale ma ni ‘upu fāifai,na te sui mai lona agaalofa ma lona agalelei i ni ‘upu leaga.
10. E to‘atele ni isi ‘ua lē fia nō atu, e lē ‘ona o le loto leaga,‘ae ‘ona ‘ua fefefe i le ‘olegia fua lava i latou.
11. E ui i lea, ‘ia e loto tele i le tagata pagātia,‘aua ‘e te fa‘atuai o sau mea alofa ‘iā te ia.
12. ‘Ia e tausi i le tagata mativa, auā le poloa‘iga;‘aua ‘e te aufuaina atu o ia, auā lona mativa.
13. ‘Ia e fa‘amaumau lau tupe mo lou uso ma lau uō,‘ae ‘aua ‘e te nanāina i lalo o se ma‘a ‘ia fa‘alēaogāina ai.
14. ‘Ia e fa‘aaogā lau tu‘ugā‘oloa e tusa ma poloa‘iga a le Silisili‘ese,‘ona sili lea lona aogā ‘iā te oe i lo le auro.
15. ‘Ia e fafao lau mea alofa i le loto o le tagata mativa,na te lavea‘i lava ‘iā te oe ai mea leaga uma.
18. Na te tau le tau‘a ma lou fili, e sili lona aogā i lo le talitā o le toa ma lana tao.
19. O le tagata amio lelei ‘ua fai ma moni o lē la te tuā‘oi,a o le tagata ‘ua lē iloa le mā na te tu‘ulafoa‘i ‘iā te ia.
20. ‘Aua ne‘i galo ‘iā te oe le alofa o lē na fai mou moni,auā ‘ua na tu‘u lona ola mo oe.
21. O le tagata agasala ma le tagata amio ‘ele‘elea la te ‘alo ‘ese i lē na fai ma moni o i lā‘ua.
22. O le tagata agasala na te faia māna o ‘oloa a lē na faia mōna moni;o lē loto leaga na te tu‘ulafoa‘i i lē na lavea‘i ‘iā te ia.
23. ‘Ua fai le tagata ma moni o lona uso, ‘ae tu‘ulafoa‘iina lava e ia, ‘ona ‘ua lē iloa e ia le mā.
24. ‘Ua fano ni isi tagata mau‘oloa ‘ona o le so‘ona fai i latou ma moni o le uso.
25. ‘Ua fa‘aaunu‘ua ai fo‘i o tagata mamalu, ‘ua ta‘asē ai i latou i nu‘u ‘ese.
26. O le tagata agasala ‘ua soli e ia poloa‘iga a le Atua,e pa‘ū lava ia i ni feagaiga faigatā;e i‘u fo‘i i le fa‘amasinoga lē ‘ua fia fai ni ana ‘oloa e tele.
27. ‘Ia e fesoasoani le uso e tusa ma se mea ‘e te mafaia,‘ae ‘ia oe ‘iā te oe ‘ina ne‘i e pa‘ū ai.
28. O mea ‘ua aupito aogā i le ola o le tagata, o le vai inu,o le mea e ‘ai, o le ‘ofu ma se fale e ufitia ai o mea e tatau ‘ona lilo.
29. E sili le mea e ‘ai a le tagata mativa i si ona fale ‘ua ato i laupapa,i mea e ‘ai aupito lelei e fai i le fale ‘ese e le tagata ‘ua leai sona ‘āiga.
30. ‘Ia malie lou loto i sina mea itiiti, pe a lē o i ai mea e tele,‘ona e lē fa‘alogo ai lea i ni ‘upu leaga ‘ona o lou ta‘asē.
31. O le olaga fa‘atigā lava le api i lea fale ma lea fale;o le fale e talia ai le mativa, e amio ai lava ia fa‘atagata ‘ese,e fefe i fai i ai sana ‘upu.
32. E talia lava ia, ‘ae a avatu mea e ‘ai ma mea e inu,e lē maua ai sana ‘upu fa‘afetai, ‘ae fa‘alogo lava ia i ‘upu ‘o‘ona,
33. “Sau ia oe, o le tagata ‘ese, teu le laulau, ‘ia e fafaga i ni isi i mea e ‘ai ‘ua ‘iā te oe.”
34. “Alu ‘ese ia oe ‘ona o le fa‘aaloalo i a‘u uō;e tatau ‘ona ‘ou toe maua lo‘u fale, ‘ua ‘ou fia talia ai o lo‘u uso.”
35. O mea lava ia ‘ua faigatā mo le tagata mafaufau,o le fa‘alogo i ‘upu leaga a le tagata na ia api ai,ma ‘upu leaga a lē na nō mai ni tupe ‘iā te ia.