1. ‘Ai sē fia taui ma sui, e taui ma sui ‘iā te ia e le Ali‘i,na te tāofimauina ana agasala.
2. ‘Ia e fa‘amāgalo atu i le uso ‘ua na fa‘aleagaina oe,‘ona fa‘amāgaloina ai lea au agasala pe a e tagi atu i ai.
3. E tāofimau e le tagata lona ita i le uso,‘ae tagi atu i le Atua i le fa‘amāgaloga.
4. E lē alofa lava ia i le tagata la te tutusa,a ‘ua tagi atu ‘ia fa‘amāgaloina mai ana ia agasala,
5. o ia o le tagata ‘augavale, a ‘ua tāofi mau i lona loto tigā,‘ona tagi atu ai lea ‘ia fa‘amāgaloina mai e le Atua;o ai sē a fautua mo ana agasala?
6. ‘Ia e manatua lou i‘uga, ‘ae sōia le toe tigā o lou loto i ou uso.
7. ‘Ua tutū mai le i‘uvale ma le oti i lē soli poloa‘iga.
8. ‘Ia e manatua le mata‘u i le Atua,‘aua lava ‘e te ita fa‘asulusulu i lē lua te tuā‘oi.
9. ‘Ia e manatua le feagaiga a le Silisili‘ese ma e fa‘amāgalo i le sesē o lē lua te tuā‘oi.
10. ‘Ia e ‘alo ‘ese i le finauvale, ‘e te fa‘amāui ai au agasala.
11. Auā o le tagata itagofie na te fa‘a‘a‘asa le finauga,a o le tagata agasala na te fa‘atupu le vā i ē sa fa‘auō,na te fa‘atupu le loto leaga i le vā o ē sa fīfīlemū.
12. E fa‘atatauina le mū o le afi i le tele o la‘au ‘ua i le pupuvao,e fua fo‘i i le mamalu o le tagata le mū o lona ita,na te fa‘aoso tele fo‘i lona ita fa‘atatau ma lona mau‘oloa.
13. O le finauga fa‘atotope e mū ai le afi, o le misa ‘ua fa‘ate‘ia ai e maligi ai le toto,a o le laulaufaiva pepelo e tupu ai le oti.
14. A ē feula i le aloiafi, e mū e pei o se afi tele; a e feanu i ai e pe ai lava;‘ae ‘ua mai le gutu mea uma e lua.
15. O le faitatala fa‘agutugutulua, ‘ia malaia ia,auā na te fa‘aatuatuaina o ni isi e to‘atele sa fīfīlemū i latou.
16. O le laulaufaiva tu‘ua‘ipepelo ‘ua na fa‘aleagaina ni isi e to‘atele,‘ua na tuliloaina i latou a‘i lea nu‘u i lea nu‘u.
17. ‘Ua na lepetia ‘olo faipāvali o tagata mau‘oloa,ma ‘ua fa‘asosofa maota o ē mamalu.
18. ‘Ua faia‘ina ‘iā te ia o ‘au a nu‘u e tele,‘ua na fa‘ata‘ape‘ape o mālō tetele.
19. O le laulaufaiva tu‘ua‘ipepelo ‘ua na tuli‘eseina fafine loto tetele,‘ua na faoa le fua o a latou galuega.
20. A sē e fa‘alogo i ai, e lē maua lava sona filemū,e lē totoe fo‘i ‘iā te ia se uō e mapu ai o ia.
21. O le tā o le sasa e tupu ai fa‘alavalava,a o le tā o le laulaufaiva e gagau ai o ivi.
22. E to‘atele ni isi ‘ua pa‘u‘ū i le pelu,‘ae sili mamao ‘ona to‘atele o ē na fasiotia i latou i le laulaufaiva.
23. ‘Amu‘ia le tagata ‘ua puipuia o ia a‘i le laulaufaiva leaga,‘ua lē tu‘uina o ia i lona ita fa‘avalea,‘ua lē ‘ave e ia lana amo, ‘ua lē noatia o ia i ana maea.
24. Auā o lana amo, o le amo u‘amea lea, a o ana maea o maea ‘apamemea.
25. O le oti e tupu mai ai, o le oti aupito leaga,e feoloolo ai lava seoli.
26. E lē tumau lona mālō; e pule lava ia i ala o tagata amio leaga,‘ae lē susunuina tagata amiotonu i lona afi.
27. E pa‘u‘ū i ai o i latou o ē tu‘ulafoa‘i i le Atua,e mū lava ‘iā te i latou, e lē matineia ai;na te tuliloa ‘iā i latou e pei o se leona, na te saeia i latou e pei o le nameri.
28. ‘Ia e si‘osi‘o ou taliga i la‘au tuitui, ‘ina ne‘i e fa‘alogo i le laulaufaiva leaga,‘ia e tu‘u i lou gutu se puipui ma se fa‘amau fa‘alava.
29. ‘Ia e tanu lau auro ma lau ario, ‘ia e faia se fua tautau e fua ai au ‘upuma se fa‘agutu e tatau ma ou laugutu.
30. ‘Ia oe ne‘i e pa‘ū ‘ona o le laulaufaiva, ‘ona e pa‘ū ai lea i luma o ou fili ‘ua lamalama ‘iā te oe,‘ona lē toe aogā lea se fofō ‘iā te oe, ‘e te oti ai lava. #