1. O le tagata paiē ‘ua fetogia o ia i ni ma‘a palapalā,e tauemu ‘iā te ia o tagata uma.
2. O le tagata paiē ‘ua fetogia o ia i tae povi,‘ai sē pa‘i atu ‘iā te ia, e lialia‘i ai ona lima.
3. O le atali‘i ‘ua lē taupulea o le māsiasi lea o lona tamā;a fa‘apea fo‘i o lona afafine, e ta‘uleagaina ai o ia.
4. O le fafine mafaufau, o le tofi ‘oloa lava ia i lana tane;a o lē ‘ua māsiasi i ai le tane, e fai ma tauemuga i lona tamā.
5. O le fafine osovale ‘ua fa‘amasiasi i lona tamā ma lana tane,e ta‘ua o ia fa‘atasi ma ē amio leaga, e ‘ino‘ino fo‘i i lā‘ua ‘iā te ia.
6. E pei o le siva i le fa‘anoanoa, e fa‘apea le apoapoa‘iga i le itūlā e lē taugalemū ai;‘ae aogā pea lava le sasa ma le a‘oa‘iga.
7. O lē a‘oa‘o atu i le vale, e pei o lē fa‘apulu o se ipu ‘omea ‘ua ta‘e.
8. O lē tautala atu i le tagata ‘ua musu e fa‘alogo ‘iā te ia,‘ua pei o lē fafagu i se tagata ‘ua moegase.
9. O lē fa‘amatala atu le poto i le vale, ‘ua tautala lava ia i se tagata ‘ua moe; ‘ua uma le fa‘amatalaga,‘ona fa‘apea mai lea o ia: “Po o le a ‘ea?”
10. ‘Ia e tagi i lē ‘ua oti, auā ‘ua leai sona toe malamalama;‘ia e tagi fo‘i i le vale, auā ‘ua leai sona mafaufau.
11. ‘Ia itiiti lau tagi ‘ona o lē ‘ua oti, auā ‘ua mālōlō lava ia.
12. ‘Ae sili le leaga o le ola o le vale i lo le oti.
13. O aso e fitu e fa‘anoanoa ai i lē ‘ua oti;a o le fa‘anoanoa i le vale ma lē amio leaga e tumau i aso uma a o ola ai i lā‘ua.
14. ‘Aua ne‘i lua talatala so‘o ma le vale,‘aua ne‘i lua feoa‘i ma le tagata lē mafaufau.
15. ‘Ia e ‘alo ‘ese ‘iā te ia, ‘ina ne‘i tigāina ai oe;‘ona lē fa‘a‘ele‘elea ai lea o oe i lana agasala.
16. ‘Ia e fa‘amamao ‘iā te ia, ‘ona e maua ai lea le mapusaga,‘ona lē mafatia lea o oe i lona valea.
17. Se ā se mea e sili lona mamafa i lo le pulu?Se ā fo‘i se tasi igoa e igoa ai, ‘ae na o le vale lava.
18. E amo gofie le oneone, le masima po o se u‘amea mamafa,‘ae ‘avegatā le tagata e lē mafaufau, le tagata valea ma le tagata amio leaga.
19. E lē āu lepetia o fa‘asoata ‘ua fusifusia fa‘atasi ‘ina ‘ia lagolago i ai le fale;e fa‘apea fo‘i le loto ‘ua fa‘amausalīina i le filifiliga a le mafaufau.
20. O le loto o le tagata mafaufau e lē fa‘avaivai lava ia ‘ona o le fefe i se tasi.
21. O le pā la‘au ‘ua fa‘atū i se mea maualuga,ma le pā ma‘a ‘ua ati a‘e e aunoa ma se palu, e lē mautū ia i le pesi mai ai o le matagi.
22. E fa‘apea le loto o le vale ‘ua fefegofie i ona manatu,e lē tu lava ia i le oso mai ai o le fefe.
23. E pei ‘ona lē mata‘u pea lava le loto o le vale ‘ua fefegofie i ona manatu,e fa‘apea ‘ona aunoa pea ma se fefe o lē mautū lava ia i poloa‘iga a le Atua.
24. O lē na te tu‘i le mata, na te fa‘aoso ifo ai ni loimata,a o lē na te tui le loto na te fa‘aoso mai ai mafaufauga lelei.
25. O lē togi ni ma‘a i manu felelei, na te tulia i latou,e fa‘apea o lē na te ‘upuleagaina o lana uō, na te fa‘aumatia o la la fa‘auō.
26. E ui ‘ina ‘ua e se‘i atu lau pelu i lau uō, ‘aua lava ‘e te fa‘avaivai ai,auā e mafai ‘ona e toe fo‘i atu i lau uō.
27. ‘Āfai fo‘i ‘ua e fai i ai ni ‘upu i lou tigā, ‘aua ‘e te fefe ai,auā e mafai se fa‘aleleiga; a o le ‘upuleagaina ma le tauemu,o le fa‘amaualuga i ai ma le fa‘aali o mea sa ta‘u mai fa‘ananā,po o le fa‘ao‘o i ai se leaga i le ala o le fa‘alata, o mea uma ia e sola ‘ese ai lava lau uō.
28. ‘Ia e fa‘amaoni pea i lau uō i aso o lona mativa,‘ina ‘ia e ‘oli‘oli ai fo‘i fa‘atasi ma ia i aso o lona manuia.
29. ‘Aua ne‘i fa‘agae‘etia lou fa‘amaoni ‘iā te ia i aso o ona puapuagā,‘ina ‘ia e mautufa‘aga ai fo‘i i lona tofi o le ‘oloa.
30. E muamua ‘ona alu a‘e le ‘ausa mai le umu ma le asu o le afi,‘ona fa‘ato‘ā aliali lea o le afi lava ia; e fa‘apea lava o ‘upu leaga,o tauemuga, o ‘upu fa‘amata‘u ‘ona muamua i le liligi o le toto.
31. ‘Ou te lē mā i puipui i la‘u uō, ‘ou te lē ‘alo ‘ese fo‘i i ona luma;a o‘o mai ni leaga ‘iā te a‘u, o talutalu lava o ia, ‘ou te ‘onosa‘i ai lava;
32. e ‘alo ‘ese lava ‘iā te ia o i latou uma e fa‘alogo i ai.
33. Po o ai na te tu‘uina se leoleo i lo‘u nei gutu,ma se fa‘amaufa‘ailoga tatau i o‘u laugutu,‘ia ‘aua le pa‘ū ai lava a‘u, ‘ia ‘aua ne‘i ‘ou fano ‘ona o lo‘u laulaufaiva. #