4. O lē vave ‘ona talitonu, o le tagata loto noa lea,e fa‘aleagaina ai o ia; o lē agasala i lona ia agaga, e tauemuina o ia.
5. E fa‘amaulaloina o lē fiafia i le amio leaga,e fa‘apu‘upu‘uina le ola o lē ‘ino‘ino i le a‘oa‘iga,a o lē ‘ino‘ino i le faitatala, ‘ua na tatao i lalo le loto leaga.
6. O lē agasala i lona ia agaga, e salamō ai lava ia;a o lē fiafia i le amio leaga, e fa‘amaulaloina o ia.
7. ‘Aua ‘e te fela‘ua‘i o ‘upu leaga ma ‘upu fa‘atigā,‘ona lē o‘o lea se leaga ‘iā te oe.
8. ‘Aua ‘e te fa‘aali solo ou manatu i lau uō ma lou fili;‘āfai fo‘i e i ai sau agasala, ‘aua ‘e te fa‘aali atu i ai.
9. Auā e fa‘alogo lava ia ‘iā te oe, ‘ona ia lamalama lea ‘iā te oe,na te fa‘atagā ufiufi lau agasala, ‘ae ‘ino‘ino lava ia ‘iā te oe,‘ona ia tu fa‘apea ai lea i ou tafatafa.
10. Na e fa‘alogo i se ‘upu e fa‘aleagaina ai lē lua te tuā‘oi?‘Ia mate lea ‘upu i lou loto; ‘aua ‘e te fefe, e lē pā ai lou manava.
11. E totigā le tagata valea ‘ona o se ‘upu,‘ua ia mapuitigā e pei o se fafine a fānau.
12. E pei o le ū ‘ua sunu‘i i le vae,e fa‘apea le ‘upu i le loto o le tagata valea.
13. ‘Ia e a‘oa‘i i lau uō, meane ‘ua lē malamalama ‘iā te ia,‘ona fa‘apea ane ai lea: “‘Ua ‘ou le faia lea mea;”‘āfai fo‘i ‘ua na faia, ‘ia ‘aua le toe saga fai lava.
14. ‘Ia e a‘oa‘i i lē lua te tuā‘oi, meane ‘ua lē faia e ia lea ‘upu;‘āfai fo‘i ‘ua na faia, ‘ia ‘aua le toe saga fai lava.
15. ‘Ia e a‘oa‘i i lau uō; auā o le mea fai so‘o le tu‘ua‘ipepelo;
16. ‘aua lava ‘e te talitonu i ‘upu uma.E i ai le tasi ‘ua agasala i le ‘upu, ‘ae lē o i ai lona loto.
17. Auā o ai se tasi e lē agasala i lona laulaufaiva?‘Ia e a‘oa‘i i lē lua te tuā‘oi, ‘ona e fa‘ato‘ā fa‘amata‘u lea ‘iā te ia.
18. ‘Ia e tu‘u lava ia i le mata‘u i le Silisili‘ese.Auā o le mata‘u i le Atua o le ‘ato‘atoa lea o le poto;o le mata‘u lava i le Atua ma le usita‘i i poloa‘iga, o le poto ‘ato‘atoa lea.