16. ‘aua lava ‘e te talitonu i ‘upu uma.E i ai le tasi ‘ua agasala i le ‘upu, ‘ae lē o i ai lona loto.
17. Auā o ai se tasi e lē agasala i lona laulaufaiva?‘Ia e a‘oa‘i i lē lua te tuā‘oi, ‘ona e fa‘ato‘ā fa‘amata‘u lea ‘iā te ia.
18. ‘Ia e tu‘u lava ia i le mata‘u i le Silisili‘ese.Auā o le mata‘u i le Atua o le ‘ato‘atoa lea o le poto;o le mata‘u lava i le Atua ma le usita‘i i poloa‘iga, o le poto ‘ato‘atoa lea.
19. O le atamai i soli poloa‘iga e lē o le poto lea;o le mafaufau fo‘i o tagata agasala, e lē o le fa‘autauta lea.
20. E i ai le loto leaga e ‘inosia lava ia; e i ai le valea o le tagata ‘ua aunoa o ia ma le poto.
21. E feoloolo le tagata ‘ua aunoa ma le poto, aunoa fo‘i ma le mafaufau, ‘ae mata‘u;‘ae leaga le tagata ‘ua mafaufau lava ia, ‘ae soli le tulafono a le Silisili‘ese.
22. ‘Ua i ai le tasi e poto a‘ia‘i, ‘ae amio leaga lava ia;
23. ma le tasi ‘ua fai ni ‘upu fa‘asausili, ‘ae moni lava ana ‘upu.‘Ua i ai le tasi e fa‘atagā fa‘amaulalo, ‘ae tumu lona loto i le pepelo.
24. ‘Ua i ai le tasi e lolo‘u na‘uā lona tino ‘ona o le fa‘amaulalo tele;‘ua i ai le tasi e punou lona ulu ma ‘ua fa‘atagā lē iloa o mea ‘ua lē fia va‘ai i ai o ia.
25. ‘Āfai o le vaivai o lona tino ‘ua lē lavā ai solitulafono,‘ae a maua e ia se itūlā e fai ai le leaga, na te faia lava.
26. O ona lava mata e iloa ai le tagata;e iloa le tagata mafaufau i ona lava foliga pe a tu mai.
27. O ‘ofu e ‘ofu ai le tagata, o le ‘ata o ona laugutu ma lana sāvaliga e maua mai ai se tala ‘iā te ia.
28. E i ai se a‘oa‘iga pepelo e tupu i le ita o le tagata fa‘amaualuga,e i ai se fa‘amasinoga ‘ua lē mautinoa lona aogā;e i ai le tasi ‘ua fa‘alologo, ‘ae fa‘autauta lava ia.