1. ‘Aua ‘e te fiafia i le fānau amio leaga pe ‘āfai ‘ua fa‘ato‘ateleina;‘aua fo‘i ‘e te ‘oli‘oli ‘iā i latou pe a le o i ai le mata‘u i le Atua.
2. ‘Aua ne‘i e fa‘alagolago i lo latou olaga,‘aua ‘e te fa‘amoemoe i la latou galuega.
3. Auā ‘ua lelei le atali‘i e to‘atasi ‘ua ia mata‘u i le Atua,‘ae leaga le to‘aafe o atali‘i amio leaga.
4. E lelei pe a e oti e aunoa ma se fānau,‘ae leaga le tu‘u i le lalolagi le fānau amio leaga.
5. O le tagata mafaufau e to‘atasi e ‘ainā ai le nu‘u ‘ato‘atoa,‘ae tu‘ulafoa‘iina le motu o tagata amio leaga.
6. Na iloa e o‘u mata o taunu‘uga e tele fa‘apenā,‘ua fa‘alogo o‘u taliga i ni mea ‘ua sili ai fo‘i ‘ona mata‘utia.
7. E mū le afi i le fa‘apotopotoga o tagata agasala;e mū le to‘asā i le nu‘u fa‘alogogatā.
8. O tagata maualuluga fo‘i ia mai anamua, na lē fa‘ato‘ese i latou mo a latou agasala,o lea ‘ua fa‘aumatia i latou ‘ona ‘ua fa‘alagolago i lo latou malosi.
9. ‘Ua lē fa‘asaoina e le Atua le ‘a‘ai sa api ai o Lota,‘ae ‘ua ‘ino‘ino ‘iā te i latou, ‘ona o a latou ‘upu fa‘asausili.
10. E le‘i fa‘asaoina i latou, a ‘ua fa‘aumatia le nu‘u ‘atoa sa mitamita i latou ‘iā latou agasala.
11. E fa‘apea fo‘i o tagata tau e onogalau o afe na fa‘apotopotoina i latou i le ma‘a‘a o o latou loto;‘ana i ai fo‘i se to‘atasi e ma‘a‘a lona ua, o se mea lava e ofo ai pe ana lē fa‘asalaina.
12. Auā ‘ua ‘iā te ia le agaalofa ma le to‘asā;e mamana le tatalo, ‘ae na te sasa‘aina lava lona to‘asā.
13. E pei o lona agaalofa, e fa‘apea fo‘i o lana fa‘asalaga;na te fa‘amasino i le tagata e tusa ma ana galuega.
14. E lē ‘alo ‘ese ‘iā te ia le tagata agasala māna mea ‘ua faoa;e lē fa‘alevaleva na‘uā fo‘i le fa‘atalitali a lē agaalofa.
15. O amioga ta‘itasi uma o le agaalofa e maua ai le tulaga o le tagata,e tusa ma le lelei o ana galuega ma lona fa‘autauta i lenei nu‘u o lona ta‘asēga.
16. ‘Aua ‘e te fa‘apea ifo, “‘Ou te lafi i le Atua; po o ai fo‘i e manatua mai a‘u i lugā?
17. E lē iloa lava a‘u i le motu o tagata e to‘atele,auā se ā fo‘i lo‘u nei agaga i le tele anoanoa‘i o mea na faia?”
18. Fa‘auta, ‘ua gatete lava i ona luma le lagi ma le lagi o lagi,le moana ma le lalolagi uma, ‘atoa ma mea ‘ua i ai.
19. E lūlūina o mauga ma mea maupu‘epu‘e,‘atoa ma fa‘avae o le lalolagi pe a silasila ifo i ai le Atua.
20. ‘Ae ‘ua tumau le loto i lona valea i mea uma ia,a ‘ua silafia e ia o loto uma lava.
21. Po o ai ‘ua malamalama ‘iā te ia ala o le Atua,ma le afā e lē āu iloa e le mata o le tagata?
22. Auā ‘ua lilo le tele o ana galuega, a o ai na te tala‘iina o galuega o lana fa‘amasinoga tonu, o ai fo‘i na te talia?Auā e mamao i le manatu o nisi le i‘uga fa‘amasinoga, e fa‘ato‘ā su‘esu‘eina o tagata uma i le aso gata‘aga.
23. O lē itiiti lona mafaufau ‘ua manatu o ia i mea noa,a o le tagata ‘ua fa‘asesēina i lona valea, e manatu o ia i mea fa‘atauva‘a.
24. Lo‘u atali‘i e,‘ia e fa‘alogo mai ‘iā te a‘u, ‘ia a‘oa‘oina ai oe i le fa‘atonu i lou mafaufau;‘ia mātau lou loto i a‘u lava ‘upu.
25. ‘Ou te fa‘aali atu le a‘oa‘oga tonu, ‘ou te fa‘asino atu matā‘upu lilo o le poto;‘ia mātau lou loto i a‘u ‘upu,‘ona ‘ou fa‘aali atu ai lea ma le mafaufau sa‘o o mea ofoofogia na tu‘uina e le Atua,mai le amataga, i galuega na ia faia; ‘ou te fa‘ailoa atu fo‘i o ia ma le fa‘amaoni.
26. O galuega a le Atua na faia i le fa‘atatau a le Atua talu le amataga, ‘ua tu‘u ‘ese‘ese o latou vaega i le fa‘ato‘ā faia lava,i le o lo latou amataga sa i ai fo‘i o mea uma o le a o‘o atu i ai.
27. ‘Ua na teuteuina ana galuega ‘ia o‘o i le fa‘avavau; e le‘i o‘o i ai se fia ‘ai po o se tigāina,e le‘i fa‘amālōlō fo‘i ‘iā latou galuega.
28. E o‘o lava i le fa‘avavau e lē feto‘ai le tasima lē la te tuā‘oi.
29. ‘Aua ‘e te vaogatā i lana fetalaiga!
30. ‘Ona silasila ifo ai lea le Atua i le lalolagima ‘ua na fa‘atumuina i ana mea lelei.
31. ‘Ua na ufitia le fogā‘ele‘ele i mea ola ‘ese‘ese uma; o le ‘ele‘ele fo‘i e toe fo‘i atu ai i latou.