5. O le tagata ‘ua fa‘aleaga o ia e ia, po o ai se tasi e agalelei i ai o ia?E lē fa‘aaogāina fo‘i e ia o ana lava ‘oloa.
6. ‘Ai sē matau‘a o ia ‘iā te ia lava,‘ua ‘avea o ia mōna lava fili aupito sauā;o le taui tatau fo‘i lea o lona loto leaga.
7. ‘Āfai fo‘i ‘ua agalelei mai i se tasi, o lana mea lea ‘ua faia ma le lē iloa ma le loto musuā;‘ae mulimuli ane ‘ua aliali lava lona loto leaga.
8. E leaga le mata o le tagata matau‘a,na te liliu‘ese lona ulu ma ‘ino‘ino i lona agaga.
9. E lē āu mā‘ona le mata o le tagata manumanu i se vaega o le amioletonu;e fa‘ato‘ā mā‘ona pe a mamae ai lona agaga ma mū ai.
10. O le mata ‘ua leaga e naunau lava ia i le leaga,e lē mā‘ona o ia i mea e ‘ai, a ‘ua mole ma ‘ua fa‘anoanoa o ia i lona lava la‘o‘ai.
11. Lo‘u atali‘i e, ‘āfai ‘ua e mau‘oa, ‘ia e tausi lelei ‘iā te oe lava,‘ia e momoli fo‘i i le Atua o mea alofa ‘ua tatau ai.
12. ‘Ia e manatua e lē tuai mai le oti ma ‘ua fa‘atonuina mai ‘iā te oe le i‘uga o seoli.Auā o le tulafono lea o le lalolagi: e oti lava le tagata.
13. A o le‘i o‘o mai le oti, ‘ia e agaalofa atu i lau uō;‘ia e fa‘aloaloa ou lima ma e fai mea alofa i le tagata mativa,e tusa ma le mea ‘ua e lavātia.
14. ‘Aua ‘e te ‘alo ‘ese i le aso fiafia,‘aua fo‘i ‘e te tu‘utia‘i sina vaega itiiti o lenā mea alofa lelei.
15. ‘E te lē tu‘ua ‘ea i ni isi o fua o lou tigāina ma au galuega ‘ina ‘ia tufatufaina i le vili?
16. ‘Ia e foa‘i atu ma ‘ia e talia mai,e ta‘uamiotonuina ai lou agaga.
17. A o le‘i o‘o mai le oti, ‘ia e tausi i le amiotonu,auā e lē āu maua i seoli ni mea e ‘ai.