7. ‘Aua ‘e te ‘upuleaga atu i se tasi, a o le‘i faia ai sau su‘esu‘ega;a uma fo‘i ‘ona su‘esu‘e, ‘ia e a‘oa‘i atu ma le fa‘atatau.
8. ‘Aua ‘e te vave tali, a o le‘i fa‘alogo lelei ou taliga;‘aua fo‘i le lafovale ni au ‘upu a o fai le lauga a se tasi.
9. ‘Aua ‘e te finauvale i se matā‘upu ‘ua e le ‘aiā i ai,‘aua fo‘i ‘e te nofo i le fa‘amasinoga fa‘atasi ma tagata agasala.
10. Lo‘u atali‘i e,‘aua ‘e te fia sagai atu i ni galuega ‘ese‘ese e tele;‘āfai ‘ua e ‘a‘apa atu i mea e tele, e lē aunoa lava oe ma ni au soligātulafono.Auā ‘āfai ‘e te tuliloaina uma, ‘e te lē āu maua;‘ae ‘āfai ‘ua e fia ‘alo ‘ese ai, ‘e te lē saogalemū lava.
11. O le tasi ‘ua galue, ‘ua fa‘ata‘alise, ‘ua tigāina;a o le tagata amioletonu ia, e atili ai lava ‘ona mativa.
12. O le tasi ‘ua tino vaivai, ‘ua tagi atu i le fesoasoani mai a ni isi,‘ua asa lona malosi, ‘ae ‘ua faula‘i lona mativa;
13. a ‘ua silasila mai ‘iā te ia le fofoga o le Atua ma le agaalofama ‘ua lavea‘i ‘iā te ia a‘i lona fa‘amaulalo ma ‘ua na fa‘aeaina lona ulu;ma ‘ua ofo ‘iā te ia ni isi e to‘atele ma ‘ua latou vivi‘i atu ai i le Atua.
14. O le manuia ma le malaia, o le ola ma le oti,o le mativa ma le mau‘oa, ‘ua mai le Atua mea uma.
15. O lo‘o i le Atua le poto ma le a‘oa‘oga ma le malamalama i tulafono;o lo‘o ‘iā te ia le alofa ma le ala o amioga lelei.
16. O le mea sesē ma le pouliuli na tutupu fa‘atasi ma tagata agasala;a o ē ‘oli‘oli i amioga leaga, e tūtūmau i ai se‘ia o‘o ‘ina toeaina i latou.