1. ‘Ia ‘outou fa‘apotopoto ‘outou, ‘inā fa‘apotopotoina ia ‘outou, le nu‘u e le mana‘omia;
2. manū o le‘i fānau mai le pule; o lo‘o mavae atu le aso pei o aputi o saito; manū o le‘i o‘o mai i le to‘asā tele o le ALI‘I ‘iā te ‘outou; manū o le‘i o‘o mai ‘iā te ‘outou le aso o le to‘asā o le ALI‘I.
3. ‘Ia ‘outou sā‘ili i le ALI‘I, ‘outou uma ‘ua agamalū i le nu‘u, o ē ‘ua faia lana fa‘amasinoga; ‘ia ‘outou sā‘ili le amiotonu ‘ia ‘outou sā‘ili le agamalū, atonu e lilo ai ‘outou i le aso o le to‘asā o le ALI‘I.
4. Auā o tu‘ulafoa‘iina Kasa, o ‘avea fo‘i Asekelona ma mea gaogao; o Asetota latou te tulia o ia i le tutonu o le lā, e lia‘iina fo‘i Ekerona.
5. ‘Oi talofa i ē nonofo i nu‘u tumatafaga, o le nu‘u o Kereti, o lo‘o fa‘asaga ‘iā te ‘outou le afioga a le ALI‘I; Kanana e, le nu‘u o Filisitia, ‘ou te fa‘aumatia oe, e i‘u ‘ina leai sē nofo ai.
6. E ‘avea fo‘i nu‘u tu matāfaga ma lotoā a manu, ma vai‘eli o ē leoleo manu, ma lotoā mamoe.
7. E ‘avea fo‘i le nu‘u mo ē o totoe o le ‘āiga o Iuta, latou te ‘a‘ai ai; o le afiafi latou te ta‘o‘oto ai i fale o Asekelona; auā e asiasi le ALI‘I lo latou Atua ‘iā te i latou ma fa‘afoisia mai la latou tāfeaga.
8. ‘Ua ‘ou fa‘alogo atu i le fāifai mai a Moapi, ma le fa‘aleaga mai a le fānauga a Amoni, ‘ua latou fāifai mai ai i lo‘u nu‘u, ma latou fa‘amaualuluga mai ai i lo latou tuā‘oi.
9. O le mea lea, o lo‘o fa‘apea mai ai le ALI‘I o ‘au le Atua o Isaraelu: ‘Ou te ola a‘u, e ‘avea lava Moapi pei o Sotoma, o le fānauga a Amoni fo‘i pei o Komoro, o le mea o i ai le vao ogoogo, ma lua o masima, o le mea gaogao fo‘i e fa‘avavau; o ē o totoe o lo‘u nu‘u latou te vetea i latou o ē totoe fo‘i o o‘u tagata latou te fai i latou mo i latou lava.
10. E o‘o lea mea ‘iā te i latou ‘ona o lo latou fa‘amaualuluga auā na latou fāifai ma fa‘amaualuga i le nu‘u o le ALI‘I o ‘au.
11. E mata‘utia le ALI‘I e i latou; auā na te fa‘aumatia atua uma o le lalolagi; e ifo tagata ‘iā te ia ta‘itasi i le mea e nofo ai, o nu‘u tumatafaga uma o nu‘u ‘ese.
12. ‘Outou Aitiope fo‘i e fasiotia ‘outou i la‘u pelu.
13. Na te fa‘aloaloa atu fo‘i lona ‘a‘ao i le itū i matū, ma fa‘aumatia Asuria; e fai fo‘i e ia o Nineva ma mea gaogao o le nu‘u naumati pei o le vao.
14. E ta‘o‘oto fo‘i i ai lafu o manu vaefā uma o nu‘u ‘ese; o le kati ma le kifota la te momoe i tumutumu o ona pou; e tagi le leo o manu i fa‘amalama, e gaogao faitoto‘a; auā e aliali mea ‘ua fai i arasi.
15. O le ‘a‘ai mitamita lenā i sa nofo fa‘atalanoa, o lē sa fa‘apea ifo i lona loto, “O a‘u lava, e leai se tasi, na o a‘u;” ‘oi! ‘ua fa‘apea ‘ona fai ma mea gaogao; o le mea e ta‘o‘oto ai manu fe‘ai; e ta‘itasi ma uisa o ē ui ane ai, e tusi atu ai o latou lima.#
Faitau le mataupu e atoatoa Sefanaia 2