1. O le afioga a le ALI‘I na o‘o mai ‘iā Sefanaia le atali‘i o Kusi, o le atali‘i lea o Ketalia, o le atali‘i lea o Amaria, o le atali‘i lea o Esekia, i ona po o Iosia le atali‘i o Amone le tupu o Iuta.
2. ‘Ua fetalai mai le ALI‘I: ‘Ou te matuā fa‘aumatia mea uma i le fogā‘ele‘ele.
3. ‘Ou te fa‘aumatia tagata ma manu vaefā, ‘ou te fa‘aumatia manu felelei ‘atoa ma i‘a o le sami, o mea fo‘i e tausuai ai ‘atoa ma tagata amio leaga, ‘ou te fa‘aumatia fo‘i tagata i le fogā‘ele‘ele, ‘ua fetalai mai ai le ALI‘I.
4. ‘Ou te fa‘aloaloa atu fo‘i lo‘u lima i luga o Iuta, ma luga o i latou uma o ē nonofo i Ierusalema, ‘ou te fa‘aumatia fo‘i i lenei mea o toe mea a Paala, o le igoa fo‘i o faitaulaga i tupua fa‘atasi ma ositaulaga;
5. o i latou fo‘i o ē ifo i ‘au o le lagi i luga o fale; o i latou fo‘i o ē ifo ma tautō i le ALI‘I, ‘ae tautō fo‘i ‘iā Moloka;
6. o i latou fo‘i o ē liliu ‘ese i le ALI‘I, ma ē e le sā‘ili i le ALI‘I pe fesili ‘iā te ia.
7. ‘Inā fa‘alologo ia i luma o le Ali‘i le ATUA, auā ‘ua latalata i le aso o le ALI‘I; auā ‘ua sauni e le ALI‘I le taulaga, ‘ua fa‘apa‘iaina e ia ē na ia tala‘iina.
8. O le aso o le taulaga a le ALI‘I ‘ou te taui atu ai i ali‘i sili ma alo o le tupu, ‘atoa fo‘i ma i latou uma o ē ‘o‘ofu i ‘ofu o nu‘u ‘ese.
9. O lea lava aso ‘ou te taui atu ai i latou uma lava o ē feosofi i le faitoto‘a ma fa‘atumu le fale o latou ali‘i i le sauā ma le pepelo.
10. O lo‘o fetalai mai le ALI‘I: O lea aso e i ai le leo o le ‘alaga i le faitoto‘a o i‘a ma le uiō i le lua o ‘a‘ai, ma le ta‘alili o le lepetia o mea e tele i mauga.
11. ‘Inā uiō ia ‘outou o ē mau i Metesa, auā ‘ua fa‘aumatia le nu‘u uma o Kanana; ‘ua fasiotia i latou uma o ē ‘ave avega o ario.
12. O ona po fo‘i ia ‘ou te su‘esu‘e ai Ierusalema i sulu, ‘ona ‘ou taui atu lea i tagata o ē ‘ua to‘a i luga o ‘alu o a latou uaina, o lo‘o fa‘apea i o latou loto, “E lē faia e le ALI‘I se mea lelei, na te lē faia fo‘i se mea leaga.”
13. E ‘avea fo‘i o latou ‘oloa ma vete, o latou fale fo‘i e ‘avea ia ma mea gaogao; latou te faia fale, ‘ae latou te lē mau ai; latou te faia tōvine fo‘i, ‘ae latou te lē feinu ai uaina.
14. O lo‘o latalata mai le aso tele o le ALI‘I, e lata mai lava, o lo‘o matuā tele vave mai lava, o le ta‘alili o le aso o le ALI‘I; e matuā tagiauē ai le toa.
15. E fai lea aso ma aso o le to‘asā, o le aso o le puapuagā ma le tigā, o le aso o le fa‘atafunaga ma le fa‘agaogaoina, o le aso o le pouliuli ma le pogisā, o le aso o ao ma le fa‘amalumalu,
16. o le aso o le pū ma le pāpā o ‘alaga i le tau‘a, e si‘i i ‘a‘ai nofo ‘olo ‘atoa ma ‘olo maualuluga.
17. ‘Ou te fa‘atigā fo‘i i tagata, latou te sāvavali ai pei o tagata tauaso, auā ‘ua latou agasala atu i le ALI‘I; e fa‘amaligiina o latou toto pei o le efuefu, e fai o latou tino fo‘i pei o otaota.
18. E lē mafai lava i o latou ario ma o latou auro ‘ona lavea‘i ‘iā te i latou i le aso o le to‘asā o le ALI‘I; ‘ae fa‘aumatia le nu‘u uma i le afi o lona fuā; auā e matuā fa‘afuase‘i ‘ona fa‘aumatia e ia o i latou uma o ē nonofo i le nu‘u.#