2. Le ALI‘I e, ‘ou te vala‘au se‘ia afea, a ‘e te lē fa‘afofoga mai; ‘ou te ‘alaga atu ‘iā te oe ‘ona o le “sauāga,” a ‘e te lē fa‘aola mai?
3. Se a ‘ea le mea ‘ua e fa‘aali mai ai ‘iā te a‘u le amio leaga ma e silasila i le puapuagā? E i o‘u luma le fa‘atafunaina ma le sauā, e i ai fo‘i le fefinaua‘iga ma le fa‘atupuina o le misa.
4. O le mea lea ‘ua fa‘alēaogāina ai le tulafono, ‘ua lē faia fo‘i le fa‘amasinoga fa‘amaoni; auā ‘ua si‘osi‘oina lē ‘ua amiotonu e lē ‘ua amio leaga, o le mea lea ‘ua fai ai le fa‘amasinoga fa‘api‘opi‘o.
5. ‘Ia ‘outou va‘ai atu i nu‘u ‘ese ma ‘ia ‘outou iloa ma ia matuā taufaiofo lava; auā ‘ou te faia se galuega i ona aso o ‘outou, e ui lava ‘ina talaina atu, tou te lē talitonu ai lava.
6. Auā fa‘auta, ‘ou te lagaina Kaletaia, o le nu‘u sauā ma le tele vavave, o lo‘o latou ō atu i le lautele o le lalolagi, e fai mo latou o mea e nonofo ai, ‘ae lē ni o latou nu‘u.
7. O i latou e mata‘utia ma le fefefe i ai o tagata; e tupu mai ‘iā te i latou lava lo latou fa‘amasinoga ma lo latou mamalu.
8. E sili ‘ona tele vavave fo‘i a latou solofanua i nameri, e sili ‘ona fe‘ai fo‘i i luko i le afiafi; e fa‘alialia fo‘i a latou ‘au e ti‘eti‘e i solofanua, o a latou ‘au fo‘i e ti‘eti‘e i solofanua e ō mai i le mea mamao; latou te felelei pei o aeto e tele vavave e ‘a‘ai ai.
9. Latou te o uma mai ‘ina ‘ia sauā; o le fa‘asaga mai o latou mata e pei o le matagi mai sasa‘e; latou te fa‘apotopotoina tagata o tau‘a e pei o le oneone.
10. Latou te tauemu i tupu, latou te tapisa fo‘i i tamaali‘i; latou te tapisa i ‘olo uma, auā latou te tanu ai le ‘ele‘ele ma latou ā‘ea.