1. ‘Ou te vivi‘i atu ‘iā te oe le ALI‘I ma lo‘u loto ‘atoa;‘ou te ta‘uta‘u atu fo‘i ou vāvega uma.
2. ‘Ou te fiafia ma ‘ou ‘oli‘oli ‘iā te oe;‘ou te pese lava i lou suafa, lē Silisili‘ese.
3. Na liutuaina o ē ‘ua ita mai ‘iā te a‘u;‘ona tausuai ai lea o i latou, ma fano lava ai ou luma.
4. Auā ‘ua e faia lo‘u fa‘amasinoga ma la‘u finauga;‘ua e ti‘eti‘e i le nofoāli‘i e fa‘amasino tonu ai.
5. ‘Ua e a‘oa‘i atu i nu‘u ‘ese;‘ua fa‘aumatia e oe o ē amio leaga,‘ua e sōloi‘esea o latou igoa e o‘o i le fa‘avavau fa‘avavau lava.
6. O ē ita mai, ‘ua fa‘aumatia e fa‘avavau o latou fa‘atafunaga;‘ua e olopalaina ‘a‘ai;‘ua galo lava le fa‘amanatuina o i latou.
7. A o le ALI‘I, e ti‘eti‘e lava ia e fa‘avavau;‘ua saunia e ia lona nofoāli‘i e fa‘amasino ai.
8. O ia lava na te fa‘amasinoina le atu laulau ma le tonu;na te fa‘atonuina ma le sa‘o finauga a nu‘u.
9. O le ALI‘I e fai ma ‘olo maualuga mo lē ‘ua fa‘asauāina,o le ‘olo maualuga i ona po e i ai le puapuagā.
10. E fa‘atuatua ‘iā te oe o ē ‘ua iloa lou suafa;auā, le ALI‘I e, ‘e te lē tu‘una i latou o ē sā‘ili ‘iā te oe.
11. ‘Inā pepese atu ia ‘outou i le ALI‘I, o lo‘o afio i Siona;‘inā fa‘aali atu ia i nu‘u ana mea na fai.
12. Auā o lē taui i le toto na te manatua i latou;na te lē fa‘agalogaloina le tagi o ē ‘ua puapuagātia.