5. ‘Ona ‘outou sōsōla lea i le vanu o i o‘u mauga; Auā e pa‘ia Asela i le vanu o mauga; tou te sōsōla fo‘i, pei ‘ona ‘outou sōsōla i le mafui‘e i ona po o Usia le tupu o Iuta; e afio mai lava le ALI‘I lo‘u Atua ma le ‘au pa‘ia uma fa‘atasi ma oe.
6. E o‘o lava i lea aso, e lē i ai le malamalama o mea aogā, a o le pouliuli lava;
7. ‘ae o‘o mai le aso, e tasi lava ia, (‘ua silafia lava e le ALI‘I,) e lē o le ao, e lē o le po; ‘ae a o‘o i le itū aso afiafi e malamalama ai.
8. O lea aso fo‘i e alu atu ai le vai ola nai Ierusalema; o le tasi ‘elia vaega e tafe atu i le sami i sasa‘e, a o le isi ona vaega e tafe atu i le sami i sisifo o le tausaga vevela ma le tausaga ma‘alili e fai ai ia mea.
9. E fai fo‘i le ALI‘I ma Tupu i le lalolagi uma lava, o lea aso ‘ua na o le ALI‘I ai lava ma lona suafa e āu tasi lea.
10. E liua le nu‘u uma pei o le fanua laugatasi, e pau mai i Kepa e o‘o i Rimoni i le itū i saute o Ierusalema; e fa‘aeaina fo‘i o ia, ma nofo i lona lava nu‘u, o pau mai i le faitoto‘a o Peniamina e o‘o i le mea sa i ai le faitoto‘a anamua, e o‘o i le faitoto‘a o tulimanu e pau mai fo‘i i le ‘olo o Hananiali, e o‘o i le tu‘ugāuaina a le tupu.
11. Latou te nonofo ai, e lē toe ai se fa‘afanoga; e nofo lava Ierusalema ma le filemū.
12. O lenei le mala e taia a‘i e le ALI‘I o nu‘u uma e tau ma Ierusalema; e lāuvale lava o latou tino, a o tutū i o latou vae; e totō o latou mata i mea e tutū ai, ma o latou laulaufaiva e fa‘aumatia ia i o latou gutu.
13. O lea aso fo‘i e i ai ‘iā te i latou le atuatuvale tele mai le ALI‘I; ‘ona ta‘itasi ai lea ma tago o le tasi i le lima o le tasi; e ta‘itasi fo‘i ma si‘i i luga o latou lima o le tasi i le tasi.
14. O Iuta fo‘i e ‘au i lā‘ua ma Ierusalema; e fa‘aputuina ‘oloa o nu‘u uma e ‘ua vagavagai, o auro, ma ario ma ‘ofu e tele lava.
15. E fa‘apea fo‘i ‘ona i ai le mala i le solofanua ma le falata ma le kamela ma le asini, ‘atoa ma manu uma e i ai i ia toagalauapi, e tusa ma lenei mala.
16. O ē totoe uma lava i nu‘u uma o ē ō mai e tau ma Ierusalema, latou te ō a‘e lava i lea tausaga ma lea tausaga e ifo i le Tupu, o le ALI‘I o ‘au; e fai ai fo‘i le tausamiga o fale apitaga.
17. A o lē le alu a‘e a‘i itū‘āiga o le lalolagi i Ierusalema e ifo i le Tupu, o le ALI‘I o ‘au ‘ona leai lea o se timuga ‘iā te i latou.
18. ‘Ae ‘āfai e lē alu a‘e le itū‘āiga o Aikupito ma latou le ō mai, e leai fo‘i se uaga ‘iā te i latou; ‘ona i ai lea o le mala e taia a‘i e le ALI‘I o nu‘u o ē le ō a‘e e fai le tausamiga o fale apitaga.
19. O le sala lenā a Aikupito ma le sala a nu‘u uma, o ē le ō a‘e e fai le tausamiga o fale apitaga.