1. O lea aso e i ai le vaipuna ‘ua su‘ena mo le ‘āiga o Tavita ma ē o nonofo i Ierusalema mo le agasala ‘atoa ma mea leaga.
2. ‘Ua fetalai mai le ALI‘I o ‘au: O lea aso, ‘ou te tineia ai igoa o tupua i le lalolagi, e lē toe manatua i latou; ‘atoa fo‘i ma perofeta ma le agaga leaga, ‘ou te fa‘ate‘a‘eseina ia i le lalolagi.
3. ‘Āfai fo‘i e toe vavalo se tasi, ‘ona fai atu ai lea ‘iā te ia o lona tamā ma lona tinā na fānaua mai ai o ia, “‘E te lē ola; auā ‘ua e tala pepelo i le suafa o le ALI‘I;” ‘ona tutu‘i ai lea ‘iā te ia e lona tamā ma lona tinā na fānaua mai ai o ia, pe a vavalo mai ai o ia.
4. O lea aso fo‘i e ta‘itasi le perofeta ma mā ai o ia i lana mea na va‘aia, pe a faia lana valo‘aga; latou te lē ‘o‘ofu fo‘i i se ‘ofu taufulufulu e pepelo ai.
5. E fai mai fo‘i o ia, “‘Ou te lē se perofeta a‘u; o a‘u le tagata e galue i fanua; auā na fa‘apologaina a‘u, talu ‘ina ‘ou taule‘ale‘a.”
6. ‘Ona fai mai lea o se tasi ‘iā te ia, “O a ‘ea ia manu‘a i ou lima?” ‘Ona fai atu lea o ia, “O mea ia na manu‘a ai a‘u i le fale o a‘u uō.”
7. “Ala mai ia, le pelu e, i lo‘u leoleo mamoe, ma le tagata ma te fa‘atasi ma a‘u,” ‘ua fetalai mai ai le ALI‘I o ‘au. ‘Inā tā ia o le leoleo mamoe, ‘ona fa‘ata‘ape‘apeina ai lea o le ‘au mamoe; ‘ona fa‘afo‘i atu lea o lo‘u lima i ē iti.
8. ‘Ua fetalai mai le ALI‘I: E o‘o ‘ina vavae‘eseina i le nu‘u uma lava ona vaega e lua, e fano lava ia; ‘ae fa‘atotoeina ai lona tolu o vaega.
9. ‘Ou te avane lona tolu o vaega i le afi ‘ou te fa‘ate‘a‘ese ai le ‘ele‘ele ‘iā te i latou, e pei ‘ona fa‘ate‘a‘eseina ai le ‘ele‘ele o le ario. ‘Ou te tofotofoina i latou, e pei ‘ona tofotofoina o le auro; e vala‘au i latou i lo‘u igoa; o a‘u fo‘i, ‘ou te tali atu ai ‘iā te i latou; ‘ou te fai ane, “O lo‘u nu‘u lava i latou;” ‘ae fai mai i latou, “O le ALI‘I o lo‘u Atua lava o ia.”#
Faitau le mataupu e atoatoa Sakaria 13