1. O le valuga masina, o le lua o tausaga o Tariu, na tulei mai ai le afioga a le ALI‘I ‘iā Sakaria le perofeta le atali‘i o Parakaio, o le atali‘i ia o Ito, o lo‘o fa‘apea mai:
2. Sa matuā to‘asā le ALI‘I i o ‘outou tamā.
3. ‘E te fai atu fo‘i ‘iā te i latou, o lo‘o fa‘apea ‘ona fetalai mai o le ALI‘I o ‘au, ‘Ia ‘outou fo‘i mai ‘iā te a‘u, ‘ua fetalai mai ai le ALI‘I o ‘au; ‘ona ‘ou fo‘i atu lea ‘iā te ‘outou, ‘ua fetalai mai ai le ALI‘I o ‘au.
4. ‘Aua tou te fa‘apei o ‘outou tamā, o ē na vala‘auina e perofeta anamua, na fa‘apea, “O lo‘o fa‘apea ‘ona fetalai mai o le ALI‘I o ‘au, ‘Inā fo‘i mai ia i o ‘outou ala leaga ma a ‘outou galuega leaga;” ‘Ae le‘i fa‘alogo mai i latou ma le‘i luai mai o latou taliga ‘iā te a‘u, ‘ua fetalai mai ai le ALI‘I.
5. O ‘outou tamā po o fea o i ai i latou? O le ‘au perofeta fo‘i, e fa‘avavau ‘ea ‘ona ola o i latou?
6. ‘Ae peita‘i o a‘u ‘upu ma a‘u tulafono, na ‘ou poloa‘i atu ai i a‘u ‘au‘auna le ‘au perofeta, na lē maua atu ai ‘ea o ‘outou tamā? ‘ona latou fo‘i mai ai lea ma latou fai mai, “E pei ‘ona finagalo o le ALI‘I o ‘au, e fai ‘iā te i matou, e tusa ma o matou ala ma o matou galuega, ‘ua fa‘apea lava ‘ona faia e ia ‘iā te i matou.”
7. O le aso e luafulu ma le fa, o le masina e sefulu ma le tasi, o le masina o Sapata lea, o le tausaga e lua o Tariu, na tulei mai ai le afioga a le ALI‘I ‘iā Sakaria le perofeta le atali‘i o Parakaio, o le atali‘i ia o Ito, o lo‘o fa‘apea mai,
8. Na ‘ou va‘ai i le po; fa‘auta fo‘i, o le tagata o lo‘o ti‘eti‘e i le solofanua mūmū, o lo‘o tu fo‘i o ia i le ulu atasi, i le paolo; o lo‘o i ona tua fo‘i o solofanua mūmū ma e ‘e‘efu ma e sisina.
9. ‘Ona ‘ou fai atu lea, “Le ali‘i e, o a ‘ea nei mea?”‘Ua fai mai ‘iā te a‘u le agelu na ma tautala, “‘Ou te fa‘ailoa ‘iā te oe le uiga o nei mea.”
10. ‘Ona tali mai lea o le tagata sa tu i le ulu atasi, ‘ua fa‘apea mai, “O i latou ia ‘ua ‘a‘auina e le ALI‘I e feoa‘i i le lalolagi.”
11. ‘Ona tali mai lea o i latou i le agelu a le ALI‘I, sa tu i le ulu atasi, ‘ua fa‘apea mai, “‘Ua matou feoa‘i lava i le lalolagi; fa‘auta fo‘i, o lo‘o nofonofo le lalolagi uma, ‘ua fīfīlemū lava.”
12. ‘Ona fai atu lea o le agelu a le ALI‘I, ‘ua fa‘apea atu, “Le ALI‘I o ‘au e, se‘i afea ‘ona e le alofa ‘iā Ierusalema ma ‘a‘ai o Iuta, ‘ua e to‘asā i ai i ia tausaga e fitugafulu?”
13. ‘Ua tali mai le ALI‘I i le agelu na ma tautala, i ‘upu lelei ma ‘upu fa‘amafanafana.
14. ‘Ua fai mai fo‘i ‘iā te a‘u le agelu na ma tautala, ‘Ia e ‘alaga, ‘ia fa‘apea atu, o lo‘o fa‘apea ‘ona fetalai mai o le ALI‘I o ‘au, ‘Ua ‘ou mā‘elegā ‘ona o Ierusalema ma Siona i le mā‘elegā tele.