Feagaiga Tuai

Feagaiga Fou

Ruta 4:5-22 O LE TUSI PA'IA - Ekalesia Katoliko Roma (RSCB)

5. ‘Ua fai atu Poasa, “O le aso ‘e te fa‘atau ai le fanua nai le lima o Naomi, ‘e te fa‘atau fo‘i nai ia Ruta le fafine Moapi, le avā a le ‘ua oti; e fa‘atumau ai le igoa o lē ‘ua oti i lona tofi.”

6. ‘Ona fai mai lea o le tagata o le ‘āiga, “‘Ou te lē mafa‘atau ai mo‘u, ne‘i ‘ou fa‘alēaogā i lo‘u tofi; ‘ia e fa‘atau mo oe le fanua, auā ‘ou te lē mafai ‘ona fa‘ataulia.”

7. O lenei le masani i Isaraelu anamua i le fa‘atau mai ma fa‘atau atu, e fa‘amau a‘i mea uma; ‘ua tatala e le tasi tagata lona se‘evae, ‘ua avatu i le tasi, o le tu lava lea a Isaraelu.

8. ‘Ua fai mai le tagata o lo latou ‘āiga ‘iā Poasa, “Fa‘atau ia mo oe;” ‘ona tatala ai lea e ia o lona se‘evae.

9. ‘Ona fai atu lea o Poasa i toeaina ma le nu‘u uma, o molimau ‘outou i lenei aso, “‘Ua ‘ou fa‘atau mea uma sa ‘iā Elimeleka, ma mea uma sa ‘iā Kiliona ma Maalona nai le lima o Naomi.

10. O Ruta fo‘i le fafine Moapi, le avā a Maalona, ‘ua ‘ou fa‘atau ‘iā te ia e fai ma a‘u avā, e fa‘atumau ai le igoa o lē ‘ua oti i lona tofi, ‘ia lē galo le igoa o lē ‘ua oti ai lona ‘au uso, ma le faitoto‘a o lona ‘a‘ai; o molimau i ai ‘outou i lenei aso.”

11. ‘Ua fai mai tagata uma sa i le faitoto‘a, ‘atoa ma toeaina, o molimau lava i ai i matou; “‘Ia ‘avea e le ALI‘I lenei fafine, o le a alu i lou ‘āiga pei o Rasela ma Lea sa la ati a‘e le ‘āiga o Isaraelu; ‘ia e malosi i Efarata, ma ‘ia vi‘ia oe i Peteleema;

12. ‘ia ‘avea fo‘i lou ‘āiga pei o le ‘āiga o Faresa na fānau mai e Tamara ‘iā Iuta, nai le fānau e foa‘i mai e le ALI‘I ‘iā te oe i lenei teine.”

13. ‘Ua ‘ave e Poasa ‘iā Ruta, ‘ua fai māna avā; ‘ua alu atu o ia ‘iā te ia ‘ona tō ai lea o ia i le pule a le ALI‘I, ‘ua fānau mai lana tama tane.

14. ‘Ua fai mai fafine ‘iā Naomi, “Fa‘afetai i le ALI‘I ‘ina ‘ua foa‘i atu ‘iā te oe i lenei aso se tasi e auga i ai lou ‘āiga, ‘ia vi‘ia lona igoa i Isaraelu.

15. E fai o ia ‘iā te oe ma fa‘amalosi o lou ola, ma tausi i lou lo‘omatua, auā o le avā a lau tama, o lē alofa ‘iā te oe, ‘ua fānau; ‘ua lelei o ia ‘iā te oe e sili i tama tane e to‘afitu.”

16. ‘Ua tago Naomi i le tama, ‘ua tu‘u i lona fatafata, ma tausi ‘iā te ia.

17. O fafine ē na tuā‘oi ma ia, ‘ua latou fa‘aigoa ‘iā te ia, ‘ua fa‘apea; “‘Ua fānau mai se tama ‘iā Naomi,” ‘ua latou fa‘aigoa ‘iā te ia, o Opeta o le tamā o ia o Iese, o le tamā o Tavita.

18. O le gafa lenei o Faresa; na fānaua e Faresa o Esarona;

19. na fānaua e Esarona; o Rama; na fānaua e Rama o Aminatapu;

20. na fānaua e Aminatapu o Naasona; na fānaua e Naasona o Salemona;

21. na fānaua e Salemona o Poasa; na fānaua e Poasa o Opeta;

22. na fānaua e Opeta o Iese; na fānaua e Iese o Tavita.#

Faitau le mataupu e atoatoa Ruta 4