1. ‘Ua alu a‘e Poasa i le faitoto‘a o le ‘a‘ai, ‘ua nofo ai; fa‘auta i le tagata o lo latou ‘āiga na fai atu ai Poasa ‘ua alu ane. ‘Ona fai atu lea o ia, “Le ali‘i e, ‘inā afe mai ia ‘inā e nofo i le mea nei;” ‘ona afe ane lea o ia, ‘ua nofo ai.
2. ‘Ua ‘a‘ami e ia toeaina o le ‘a‘ai e to‘asefulu, ‘ua fai atu i ai, “‘Inā nonofo ia ‘outou i le mea nei;” ‘ona latou nonofo ai lea.
3. ‘Ona fai atu lea o ia i le tagata o lo latou ‘āiga, “O le fasi fanua sa i lo tā uso o Elimeleka o le a fa‘atau e Naomi, ‘ua fo‘i mai nai le nu‘u o Moapi;
4. na ‘ou fai ane fo‘i, ‘ou te ta‘u atu ‘iā te oe, o lo‘o fa‘apea, ‘Inā fa‘atau ia i luma o ē nonofo mai, ma luma o toeaina o lo‘u nu‘u; ‘āfai ‘e te fa‘atau ai, ‘inā fa‘atau ia; ‘āfai ‘e te lē fa‘ataulia, ‘inā fai mai ia ‘iā te a‘u ‘ina ‘ia ‘ou iloa; auā e leai se tasi e muamua ‘iā te oe i le fa‘atau; o a‘u fo‘i ‘ou te aupito atu ‘iā te oe.”‘Ona fai mai lea o ia, “‘Ou te fa‘ataulia lava.”
5. ‘Ua fai atu Poasa, “O le aso ‘e te fa‘atau ai le fanua nai le lima o Naomi, ‘e te fa‘atau fo‘i nai ia Ruta le fafine Moapi, le avā a le ‘ua oti; e fa‘atumau ai le igoa o lē ‘ua oti i lona tofi.”
6. ‘Ona fai mai lea o le tagata o le ‘āiga, “‘Ou te lē mafa‘atau ai mo‘u, ne‘i ‘ou fa‘alēaogā i lo‘u tofi; ‘ia e fa‘atau mo oe le fanua, auā ‘ou te lē mafai ‘ona fa‘ataulia.”
7. O lenei le masani i Isaraelu anamua i le fa‘atau mai ma fa‘atau atu, e fa‘amau a‘i mea uma; ‘ua tatala e le tasi tagata lona se‘evae, ‘ua avatu i le tasi, o le tu lava lea a Isaraelu.
8. ‘Ua fai mai le tagata o lo latou ‘āiga ‘iā Poasa, “Fa‘atau ia mo oe;” ‘ona tatala ai lea e ia o lona se‘evae.
9. ‘Ona fai atu lea o Poasa i toeaina ma le nu‘u uma, o molimau ‘outou i lenei aso, “‘Ua ‘ou fa‘atau mea uma sa ‘iā Elimeleka, ma mea uma sa ‘iā Kiliona ma Maalona nai le lima o Naomi.
10. O Ruta fo‘i le fafine Moapi, le avā a Maalona, ‘ua ‘ou fa‘atau ‘iā te ia e fai ma a‘u avā, e fa‘atumau ai le igoa o lē ‘ua oti i lona tofi, ‘ia lē galo le igoa o lē ‘ua oti ai lona ‘au uso, ma le faitoto‘a o lona ‘a‘ai; o molimau i ai ‘outou i lenei aso.”
11. ‘Ua fai mai tagata uma sa i le faitoto‘a, ‘atoa ma toeaina, o molimau lava i ai i matou; “‘Ia ‘avea e le ALI‘I lenei fafine, o le a alu i lou ‘āiga pei o Rasela ma Lea sa la ati a‘e le ‘āiga o Isaraelu; ‘ia e malosi i Efarata, ma ‘ia vi‘ia oe i Peteleema;