1. E! ‘Ana fai oe mo‘u tuagane,ana e susu i susu o lo‘u tinā.‘Ona tā feasogi ai lea ma oe,pe a ‘ou iloa oe i fafo,‘ae latou te lē ‘inosia ai a‘u.
2. ‘Ona ‘ou ta‘ita‘i ai lea ‘iā te oe,ma ‘ou ‘aumaia oe i le fale o lo‘u tinā,‘e te a‘oa‘o mai ‘iā te a‘u.‘Ou te avatu ‘iā te oe le uaina manogima le sua o la‘u rimoni ‘e te inu ai.
3. ‘Ua i lalo o lo‘u ulu lona lima tauagavale,‘ua fusi mai fo‘i ‘iā te a‘u lona lima taumatau.
4. Tama fafine e Ierusalema e,‘ou te fai atu ‘iā te ‘outou,‘ia tautō mai,tou te lē tātātuli pe fafagu i la‘u pele,se‘ia faitalia lava o ia.
5. O ai ‘ea lenā, o lo‘o alu a‘e mai le vao,o lo‘o fa‘alagolago i lona manamea?Na ‘ou fafagu ‘iā te oe i lalo o le moli;na ‘o‘ono ai lou tinā ‘iā te oe i lea mea;na ia ‘o‘ono ai ma fānau mai ai e ia o oe i lea mea.
6. ‘Ia tu‘uina a‘u i lou loto e fa‘apei o se fa‘amaufa‘ailoga,e fa‘apei o se fa‘amaufa‘ailoga i lou lima.Auā ‘ua malosi le alofa e pei o le oti;‘ua fa‘auluulumamau le tu‘inanau e fa‘apei o le tu‘ugamau;o lona mumū, o le mumū lea o le afi mū saesae.