1. A o lenei, le Ali‘i mamana e, le Atua o Isaraelu, ‘ua tagi atu ‘iā te oe agaga puapuagātia ma le loto ‘ua ātu lava ia.
2. Le Ali‘i e, ‘ia e fa‘afofoga ma e alofa mai, auā o oe o le Atua agaalofa, ‘ia e alofa mai fo‘i ‘iā i matou, auā ‘ua matou agasala i ou luma.
3. Auā e fai oe ma tupu e fa‘avavau pe fano fo‘i i matou e fa‘avavau?
4. Le Ali‘i mamana e, le Atua o Isaraelu, ‘ia e fa‘afofoga nei i le ōlega a ē ‘ua oti o Isaraelu ma le fānau a ē na latou agasala i ou luma ma ‘ua latou lē fa‘alogo i le si‘ufofoga o le Ali‘i lo latou Atua, e i ai ‘ona pesi mai o mala ‘iā te i matou.
5. ‘Aua ne‘i e manatua le amio leaga a o matou tamā, ‘ae ‘ia e manatua lou ‘a‘ao mamana ma lou suafa i nei lava aso;
6. auā o oe o le Ali‘i, o lo matou Atua, matou te vivi‘i atu ai ‘iā te oe, le Ali‘i e.
7. Auā o le mea lava lea na e tu‘u mai ai le mata‘u ‘iā te oe ‘iā i matou loto, ‘ina ‘ia matou vala‘au ai i lou suafa ma ‘ia matou vivi‘i atu ‘iā te oe i lo matou tāfeaga, auā ‘ua matou liliu‘ese i le amio leaga a o matou tamā, o ē na agasala i ou luma.
8. A o le aso nei ‘ua i ai i matou i lo matou tāfeaga, na e fa‘ata‘ape‘apeina ai i matou ‘ia ‘avea ma tauemuga ma ‘upu fāifai ma sala o agasala, e tusa ma amioga leaga uma a o matou tamā na latou fouvale ‘iā te oe, le Ali‘i e, lo matou Atua.
9. Isaraelu e,‘ia e fa‘alogologo mai ia i poloa‘iga o le ola;‘ia e ua‘i mai ou taliga, ‘ina ‘ia e maua ai le fa‘autauta.
10. Isaraelu e, se ā le mea ‘ua i ai oe i le nu‘u o ou fili?
11. ‘Ua fa‘alevaleva ou aso i le nu‘u ‘ese, ‘ua fa‘aleagaina oe i tagata oti,‘ua faitauina oe fa‘atasi ma ē ‘ua ō ifo i seoli.
12. Na e tu‘ulafoa‘iina le punāvai o le poto.
13. Auā ‘ana e savali i le ala o le Atua, po ‘ua e mautū lava i le filemū e fa‘avavau.
14. ‘Ia e sā‘ili po o fea e i ai le fa‘autauta, po o fea e i ai le malosi,po o fea e i ai le mafaufau, ‘ina ‘ia e iloa ai fo‘i po o fea e i ai le olaga fa‘alevaleva,le ola moni, le fiafia o mata, le filemū.
15. ‘Ua maua e ai lona nofoaga?O ai ‘ua ulu atu i le mea e teu ai ana ‘oa?
16. O ifea ‘ea o ta‘imua o nu‘u ‘ese,na latou pulea o manu fe‘ai ‘ua i le lalolagi?