2. ‘Āfai e tautō se tane i se tautoga i le ALI‘I, pe tu‘u augani e fa‘amauina a‘i o ia; ‘aua ne‘i tu‘umavaega o ia i lana ‘upu, ‘ae faia lava e ia e tusa ma mea uma ‘ua mavae atu i lona gutu.
3. ‘Āfai fo‘i e tautō se fafine i se tautoga i le ALI‘I, e fa‘amauina a‘i fo‘i o ia, a o teine muli ia i le ‘āiga o lona tamā;
4. ‘āfai fo‘i e fa‘alogo lona tamā i lana tautoga, ma le mea na ia fa‘amauina ai o ia, ‘ae fa‘alologo lona tamā ‘iā te ia, ‘ona tumau ai lea o mea uma ‘ua ia tautō ai; e tumau fo‘i o mea uma na ia fa‘amauina ai o ia.
5. ‘Ae ‘āfai e vavao lona tamā ‘iā te ia i le aso na ia lagona ai, ‘ona lē tumau ai lea o se mea e tasi na ia tautō ai, po o se mea na ia fa‘amauina ai o ia; e fa‘amāgaloina fo‘i o ia e le ALI‘I, auā ‘ua vaoia o ia e lona tamā.
6. ‘Āfai ‘ua nofo tane o ia ‘ina o tautō o ia, pe tautala fa‘alēmafaufau i se mea na ia fa‘amauina ai o ia;
7. ‘ua fa‘alogo fo‘i lana tane, ‘ae fa‘alologo o ia ‘iā te ia i le aso na ia lagona ai; ‘ona tumau ai lea o mea ‘ua ia tautō ai, ma mea fo‘i na ia fa‘amauina ai o ia.
8. ‘Ae ‘āfai e vavao lana tane ‘iā te ia i le aso na ia lagona ai, ‘ona tatalaina lea e ia o le mea na ia tautō ai, ma le mea na ia tautala fa‘alēmafaufau ai na ia fa‘amauina ai o ia; e fa‘amāgaloina fo‘i o ia e le ALI‘I.
9. A o le tautoga a le fafine ‘ua oti lana tane po o le fafine ‘ua fa‘ate‘a e lana tane, o mea uma na ia fa‘amauina ai o ia e tūtūmau ‘iā te ia.
10. ‘Āfai fo‘i e tautō o ia a o i le fale o lana tane, pe fa‘amauina o ia e ia i se augani;
11. ‘ua fa‘alogo ai fo‘i lana tane, ‘ae fa‘alologo o ia ‘iā te ia, ‘ua lē vavao ‘iā te ia, ‘ona tūtūmau lea o mea uma na ia tautō ai, e tūtūmau fo‘i o mea uma na ia fa‘amauina ai o ia.
12. ‘Ae ‘āfai ‘ua matuā tatalaina ia mea e lana tane i le aso na ia lagona ai, e lē tumau se mea e tasi na mavae atu i lona gutu i mea na ia tautō ai, po o le mea na ia fa‘amauina ai o ia, ‘ua tatalaina ia mea e lana tane; e fa‘amāgaloina fo‘i o ia e le ALI‘I.
13. O tautoga uma, ‘atoa ma augani uma e fa‘amau a‘i e fa‘atigā ai o ia e ia, e mafai i lana tane ‘ona fa‘atumauina, e mafai fo‘i i lana tane ‘ona tatalaina.
14. ‘Ae ‘āfai e matuā fa‘alologo lana tane ‘iā te ia i lea aso ma lea aso, ‘ona fa‘atumauina lea e ia o mea uma na ia tautō ai, ma mea uma na fa‘amauina ai o ia; ‘ua ia fa‘amauina ia mea ma ‘ua fa‘alologo o ia ‘iā te ia i le aso na ia lagona ai.
15. ‘Ae ‘āfai ‘ua uma ‘ona ia lagona ia mea, ‘ae mulimuli ane ‘ona matuā tatalaina lea e ia, ‘ona nofo sala ai lea o ia i le sala a le fafine.
16. O tulafono ia na fetalai mai ai le ALI‘I ‘iā Mose i le tane ma lana avā; o le tamā fo‘i ma lona afafine, o le teine muli o ia i le ‘āiga o lona tamā.