9. E ‘iā te oe lenei mea i mea e sili ‘ona pa‘ia, i taulaga e fai i le afi; o a latou taulaga uma, o a latou taulaga i mea e ‘ai uma, ma a latou taulaga uma mo le agasala, ma a latou taulaga uma mo le sesē, latou te ‘aumai ai ‘iā te a‘u, o mea e sili ‘ona pa‘ia, e ‘iā te oe ma ou atali‘i ia mea.
10. ‘E te ‘ai ai i le mea e sili ‘ona pa‘ia, o tane uma latou te ‘a‘ai ai; o le mea pa‘ia lava lea ma oe.
11. E ‘iā te oe fo‘i lenei mea; o le taulaga si‘i a‘i la latou mea foa‘iina ma taulaga lūlū uma lava a le fānauga a Isaraelu; ‘ua ‘ou foa‘iina ia mea ‘iā te oe, o ou atali‘i fo‘i ma ou afafine fa‘atasi ma oe, o le tulafono lea e fa‘avavau; ‘atoa uma ē ‘ua mamā i lou ‘āiga latou te ‘a‘ai ai.
12. O mea uma e sili ‘ona lelei o le suāu‘u, ma mea uma e sili ‘ona lelei o i le uaina ma le saito; o fa‘apolopolo o ia mea latou te ‘aumaia i le ALI‘I, ‘ou te foa‘iina ia mea ‘iā te oe.
13. O mea uma e mua‘i matutua i o latou fanua, e ‘aumaia e i latou i le ALI‘I, e ‘iā te oe lava ia mea; ‘atoa uma ē ‘ua mamā i lou ‘āiga latou te ‘a‘ai ai.
14. O mea uma e fa‘atoina mai ‘iā Isaraelu, e ‘iā te oe lava ia mea.
15. O mua‘i fānau uma i mea ola uma lava e ‘aumai e i latou i le ALI‘I o tagata ‘atoa ma manu, e ‘iā te oe lava ia; ‘ae suia lava le ulumatua a le tagata, o le ulua‘i tama fo‘i a le manu e le mamā o suia fo‘i lea.
16. O ē a suia ‘e te suia lava i latou e āfua mai i ē ‘ua tasi le masina, ‘ia tusa ma lau fa‘atatau, o tupe e lima sekeli, o le sekeli lea o le malumalu, e luafulu o kire lea.
17. A o le ulua‘i tama a le povi, ma le ulua‘i tama a le mamoe, ma le ulua‘i tama a le ‘oti, ‘e te lē suia lava ia; e pa‘ia i latou; ‘e te sausauina o latou toto i luga o le fatafaitaulaga, ‘e te sunua fo‘i o latou ga‘o o le taulaga e fai i le afi, o le mea manogi lelei lea i le ALI‘I.
18. A o latou tino, e fai mā oe lava ia, e fa‘apei ‘ona fai ma oe o le fatafata e lūlūina ma le ālagalima taumatau.
19. O taulaga si‘i uma i mea pa‘ia e ‘aumaia e le fānauga a Isaraelu i le ALI‘I ‘ua ‘ou foa‘iina lava ‘iā te oe, ma ou atali‘i, ma ou afafine fa‘atasi ma oe, o le tulafono lea e fa‘avavau, o le feagaiga masima lea e fa‘avavau i luma o le ALI‘I ‘iā te oe ma au fānau fa‘atasi ma oe.
20. ‘Ua fetalai mai fo‘i le ALI‘I ‘iā Arona: ‘E te lē maua se tofi i o latou lau‘ele‘ele; e leai fo‘i sou fanua ‘iā te i latou, o a‘u lava o lou fanua, ma lou tofi i le fānauga a Isaraelu.
21. Fa‘auta fo‘i, ‘ua ‘ou foa‘iina atu i le fānauga a Levī o lona sefulu o mea uma o i Isaraelu e fai ma tofi ‘ona o la latou galuega latou te ‘au‘auna ai, o le galuega lea o le fale fetāfa‘i o le fa‘apotopotoga.
22. ‘Aua fo‘i ne‘i toe fa‘alatalata le fānauga a Isaraelu i le fale fetāfa‘i o le fa‘apotopotoga, ne‘i latou nofo sala, ma oti ai.
23. ‘Ae ‘au‘auna sa Levī i le galuega o le fale fetāfa‘i o le fa‘apotopotoga, e tau‘ave fo‘i e i latou a latou amioletonu; o le tulafono lenei e fa‘avavau ‘iā ‘outou augatupulaga, latou te lē maua so latou tofi fa‘atasi ma le fānauga a Isaraelu.
24. A o lona sefulu o mea a le fānauga a Isaraelu latou te ‘aumaia i le ALI‘I e fai ma taulaga si‘i, ‘ua ‘ou foa‘iina ia mea i sa Levī e fai mo latou tofi; o le mea lea na ‘ou fai atu ai ‘iā te i latou, Latou te lē maua so latou tofi fa‘atasi ma le fānauga a Isaraelu.
25. ‘Ua fetalai mai fo‘i le ALI‘I ‘iā Mose, ‘ua fa‘apea mai:
26. ‘Ia e fai atu fo‘i i sa Levī, ‘ia fa‘apea atu ‘iā te i latou, Pe a ‘outou talia nai le fānauga a Isaraelu o lona sefulu o mea ‘ua foa‘iina e a‘u ‘iā te ‘outou mai ‘iā te i latou, e fai mo ‘outou tofi, ‘ona ‘outou ‘aumai ai lea ai ia mea o lona sefulu nai le sefulu e fai ma taulaga si‘i i le ALI‘I.
27. E ta‘ua fo‘i ‘iā te ‘outou la ‘outou taulaga si‘i, e peiseaī o le saito a‘i le mea e soli ai saito, e peiseaī fo‘i o le tumu o le mea e soli ai vine.