19. O taulaga si‘i uma i mea pa‘ia e ‘aumaia e le fānauga a Isaraelu i le ALI‘I ‘ua ‘ou foa‘iina lava ‘iā te oe, ma ou atali‘i, ma ou afafine fa‘atasi ma oe, o le tulafono lea e fa‘avavau, o le feagaiga masima lea e fa‘avavau i luma o le ALI‘I ‘iā te oe ma au fānau fa‘atasi ma oe.
20. ‘Ua fetalai mai fo‘i le ALI‘I ‘iā Arona: ‘E te lē maua se tofi i o latou lau‘ele‘ele; e leai fo‘i sou fanua ‘iā te i latou, o a‘u lava o lou fanua, ma lou tofi i le fānauga a Isaraelu.
21. Fa‘auta fo‘i, ‘ua ‘ou foa‘iina atu i le fānauga a Levī o lona sefulu o mea uma o i Isaraelu e fai ma tofi ‘ona o la latou galuega latou te ‘au‘auna ai, o le galuega lea o le fale fetāfa‘i o le fa‘apotopotoga.
22. ‘Aua fo‘i ne‘i toe fa‘alatalata le fānauga a Isaraelu i le fale fetāfa‘i o le fa‘apotopotoga, ne‘i latou nofo sala, ma oti ai.
23. ‘Ae ‘au‘auna sa Levī i le galuega o le fale fetāfa‘i o le fa‘apotopotoga, e tau‘ave fo‘i e i latou a latou amioletonu; o le tulafono lenei e fa‘avavau ‘iā ‘outou augatupulaga, latou te lē maua so latou tofi fa‘atasi ma le fānauga a Isaraelu.
24. A o lona sefulu o mea a le fānauga a Isaraelu latou te ‘aumaia i le ALI‘I e fai ma taulaga si‘i, ‘ua ‘ou foa‘iina ia mea i sa Levī e fai mo latou tofi; o le mea lea na ‘ou fai atu ai ‘iā te i latou, Latou te lē maua so latou tofi fa‘atasi ma le fānauga a Isaraelu.
25. ‘Ua fetalai mai fo‘i le ALI‘I ‘iā Mose, ‘ua fa‘apea mai:
26. ‘Ia e fai atu fo‘i i sa Levī, ‘ia fa‘apea atu ‘iā te i latou, Pe a ‘outou talia nai le fānauga a Isaraelu o lona sefulu o mea ‘ua foa‘iina e a‘u ‘iā te ‘outou mai ‘iā te i latou, e fai mo ‘outou tofi, ‘ona ‘outou ‘aumai ai lea ai ia mea o lona sefulu nai le sefulu e fai ma taulaga si‘i i le ALI‘I.
27. E ta‘ua fo‘i ‘iā te ‘outou la ‘outou taulaga si‘i, e peiseaī o le saito a‘i le mea e soli ai saito, e peiseaī fo‘i o le tumu o le mea e soli ai vine.
28. E fa‘apea ‘ona ‘aumaia e ‘outou fo‘i se taulaga si‘i i le ALI‘I a‘i lona sefulu uma i mea tou te maua mai le fānauga a Isaraelu; tou te avatua fo‘i ai ia mea ‘iā Arona le ositaulaga le taulaga si‘i i le ALI‘I.
29. E ‘aumaia e ‘outou i le ALI‘I o taulaga si‘i uma i mea uma ‘ua foa‘iina mai ‘iā te ‘outou; o mea uma o i ai e sili ‘ona lelei, o le mea pa‘ia o i ai.
30. ‘Ia e fai atu fo‘i ‘iā te i latou, Pe a uma ‘ona si‘itia e ‘outou o mea e sili ‘ona lelei o i ai, ‘ona ta‘ua lea o ia mea i sa Levī e peiseaī o mea e maua mai i le mea e soli ai saito, e peiseaī fo‘i o mea e maua mai i le mea e soli ai vine.
31. Tou te ‘a‘ai ai fo‘i i mea uma, o ‘outou ma o ‘outou ‘āiga; auā o le taui lenā o la ‘outou galuega i le fale fetāfa‘i o le fa‘apotopotoga.
32. Tou te lē nofo sala fo‘i ‘ona o lea mea pe a uma ‘ona si‘itia e ‘outou o mea e sili ‘ona lelei o i ai; ‘aua fo‘i tou te solia mea pa‘ia a le fānauga a Isaraelu, ‘ina ne‘i ‘outou oti.