1. ‘Ua fetalai mai fo‘i le ALI‘I ‘iā Arona: O oe, ma ou atali‘i, ma le ‘āiga o lou tamā fa‘atasi ma oe, e tau‘ave e ‘outou le amioletonu o i le malumalu; o oe fo‘i ma ou atali‘i fa‘atasi ma oe, e tau‘ave e ‘outou le amioletonu o i le ‘outou faiva o ositaulaga.
2. O ou uso fo‘i o le itū‘āiga o Levī o le itū‘āiga o lou tamā, ‘e te fa‘alatalataina mai i latou fa‘atasi ma oe ‘ina ‘ia fa‘atasia i latou ‘iā te oe, ma latou ‘au‘auna ‘iā te oe, a o oe ma ou atali‘i fa‘atasi ma oe tou te ‘au‘auna i luma o le fale fetāfa‘i e i ai le tulafono.
3. Latou te tausia fo‘i mea o ‘iā te oe e tausi, ma le tausiga o le fale fetāfa‘i uma; tau lava ‘ina ne‘i latou fa‘alatalata i ipu o le malumalu ma le fatafaitaulaga, ‘ina ne‘i latou oti, o i latou ‘atoa fo‘i ma ‘outou.
4. E fa‘atasia fo‘i i latou ‘iā te oe, ma latou ‘ana‘ana i le tausiga o le fale fetāfa‘i o le fa‘apotopotoga, e fai ai le galuega uma o le fale fetāfa‘i; ‘ae ‘aua ne‘i fa‘alatalata se tagata ‘ese ‘iā te ‘outou.
5. Tou te ‘ana‘ana fo‘i i le tausiga o le malumalu ma le tausiga o le fatafaitaulaga, ‘ina ne‘i toe o‘o le to‘asā i le fānauga a Isaraelu.
6. Fa‘auta, o a‘u fo‘i, ‘ua ‘ou ‘avea o ‘outou uso o sa Levī a‘i le fānauga a Isaraelu; ‘ua foa‘iina atu i latou ‘iā te ‘outou, ‘ua foa‘iina lava mo le ALI‘I, e fai le galuega o le fale fetāfa‘i o le fa‘apotopotoga.
7. A o oe ma ou atali‘i fa‘atasi ma oe, tou te tausia lo ‘outou faiva o ositaulaga i mea uma o le fatafaitaulaga, ma mea fo‘i i tua o le ‘ie puipui; tou te ‘au‘auna ai fo‘i; ‘ua ‘ou foa‘iina atu lo ‘outou faiva o ositaulaga, o le galuega foa‘iina lava; o le tagata ‘ese fo‘i e fa‘alatalata i ai e fasiotia lava ia.
8. ‘Ua fetalai mai fo‘i le ALI‘I ‘iā Arona: Fa‘auta, o a‘u fo‘i, ‘ua ‘ou foa‘iina atu ‘iā te oe le tausiga o a‘u taulaga si‘i i mea pa‘ia uma a le fānauga a Isaraelu; ‘ua ‘ou foa‘iina atu ai ‘iā te oe ma ou atali‘i ‘ona o le fa‘au‘uina, o le tulafono lea e fa‘avavau.
9. E ‘iā te oe lenei mea i mea e sili ‘ona pa‘ia, i taulaga e fai i le afi; o a latou taulaga uma, o a latou taulaga i mea e ‘ai uma, ma a latou taulaga uma mo le agasala, ma a latou taulaga uma mo le sesē, latou te ‘aumai ai ‘iā te a‘u, o mea e sili ‘ona pa‘ia, e ‘iā te oe ma ou atali‘i ia mea.
10. ‘E te ‘ai ai i le mea e sili ‘ona pa‘ia, o tane uma latou te ‘a‘ai ai; o le mea pa‘ia lava lea ma oe.
11. E ‘iā te oe fo‘i lenei mea; o le taulaga si‘i a‘i la latou mea foa‘iina ma taulaga lūlū uma lava a le fānauga a Isaraelu; ‘ua ‘ou foa‘iina ia mea ‘iā te oe, o ou atali‘i fo‘i ma ou afafine fa‘atasi ma oe, o le tulafono lea e fa‘avavau; ‘atoa uma ē ‘ua mamā i lou ‘āiga latou te ‘a‘ai ai.
12. O mea uma e sili ‘ona lelei o le suāu‘u, ma mea uma e sili ‘ona lelei o i le uaina ma le saito; o fa‘apolopolo o ia mea latou te ‘aumaia i le ALI‘I, ‘ou te foa‘iina ia mea ‘iā te oe.
13. O mea uma e mua‘i matutua i o latou fanua, e ‘aumaia e i latou i le ALI‘I, e ‘iā te oe lava ia mea; ‘atoa uma ē ‘ua mamā i lou ‘āiga latou te ‘a‘ai ai.
14. O mea uma e fa‘atoina mai ‘iā Isaraelu, e ‘iā te oe lava ia mea.