15. ‘Ona ita tele lava lea o Mose, ‘ua na fai atu fo‘i i le ALI‘I, “‘Aua ‘e te silasila ‘iā latou taulaga; ‘ou te le‘i ‘avea sa latou asini e tasi, ‘ou te le‘i agaleaga atu fo‘i i so latou e to‘atasi.”
16. ‘Ua fai atu fo‘i Mose ‘iā Koru, “‘Inā ō mai ia i luma o le ALI‘I a taeao, o oe ma i latou uma o ē ‘au fa‘atasi ma oe, o oe, ma i latou, ‘atoa fo‘i ma Arona.
17. ‘Ia ta‘itasi fo‘i le tagata ma ‘aumai lana salefu, ma avane i ai ni mea manogi, ma ‘ia ‘outou ‘aumai ta‘itasi e le tagata lana salefu i luma o le ALI‘I, e lua selau ma le lima sefulu o salefu; o oe fo‘i ma Arona ‘ia ta‘itasi ma lana salefu.”
18. ‘Ona latou ‘aumai ai lea ta‘ito‘atasi ma lana salefu, ma latou avane i ai ni afi, ma avane i ai mea manogi, ‘ua latou tutū fa‘atasi fo‘i ma Mose ma Arona i le faitoto‘a o le fale fetāfa‘i o le fa‘apotopotoga.
19. ‘Ona fa‘apotopotoina ai lea e Koru o le fa‘apotopotoga uma lava i le faitoto‘a o le fale fetāfa‘i o le fa‘apotopotoga e tete‘e ‘iā te i lā‘ua; ‘ona fa‘aali mai ai lea o le pupula o le ALI‘I i le fa‘apotopotoga uma lava.
20. ‘Ona fetalai mai lea o le ALI‘I ‘iā Mose ma Arona, ‘ua fa‘apea mai:
21. ‘Inā vavae ‘ese ia ‘oulua i lenei fa‘apotopotoga, se‘ia ‘ou fa‘aumatia i latou e pei o se ‘emo o le mata.
22. ‘Ona fa‘apa‘u‘ū faō ai lea o i lā‘ua, ‘ua fa‘apea atu, “Le Atua e, o le Atua o agaga o tagata uma, a agasala le tagata e to‘atasi, ‘e te to‘asā mai ai ‘ea i le fa‘apotopotoga uma lava?”
23. ‘Ona fetalai mai ai lea o le ALI‘I ‘iā Mose, ‘ua fa‘apea mai:
24. ‘Ia e fai atu i le fa‘apotopotoga, ‘ia fa‘apea atu, ‘Inā ō ‘ese atu ia ‘outou i itū uma o fale ‘ie o Koru, ma Tatano, ma Apiramo.
25. ‘Ona tula‘i ai lea o Mose, ‘ua alu atu ‘iā Tatano ma Apiramo, ‘ua mulimuli atu fo‘i ‘iā te ia toeaina o Isaraelu.
26. ‘Ona fai atu ai lea o ia i le fa‘apotopotoga, ‘ua fa‘apea atu, “‘Ou te ‘ai‘oi atu, ‘ia ‘outou ō ‘ese i fale ‘ie o ia tagata amio leaga, ‘aua fo‘i ne‘i papa‘i atu i sina a latou mea, ‘ina ne‘i fano ‘outou ‘iā latou agasala uma.”
27. ‘Ona ō ‘ese ai lea o i latou i itū uma o fale ‘ie o Koru, ma Tatano, ma Apiramo; ‘ona ulu fafo ai lea o Tatano ma Apiramo, ‘ua tutū i faitoto‘a o lā‘ua fale ‘ie, ma a la avā, ma o lā‘ua atali‘i, ma a la tama iti.
28. ‘Ona fai atu ai lea o Mose, “O le mea lava lenei tou te iloa ai na ‘auina mai a‘u e le ALI‘I e fai ia galuega uma, ‘ae le‘i fai i lo‘u lava loto.
29. ‘Āfai e oti ia tagata e pei o le oti o tagata uma, pe o‘o ‘iā te i latou e pei ‘ona o‘o i tagata uma, ‘ona iloa lea ‘ua lē ‘auina a‘u e le ALI‘I.
30. ‘Ae ‘āfai e faia e le ALI‘I le mea fou, ma fa‘amaga le gutu o le ‘ele‘ele, ma folo ‘iā te i latou, ma mea uma o lo‘o ‘iā te i latou, ma latou ō ifo i seoli o ola lava, ‘ona ‘outou iloa ai lea ‘ua ‘ino‘ino ia tagata i le ALI‘I.”