7. ‘Ae lē fa‘apea la‘u ‘au‘auna o Mose,o lē fa‘amaoni i lo‘u ‘āiga uma lava.
8. Ma te fa‘afesaga‘i ‘ona mā tautala ma ia, e fa‘aali lava,‘ae lē o ‘upu lilo; o le fa‘atusa fo‘i o le ALI‘I na te va‘ava‘ai i ai;na ‘oulua le fefefe ‘ea i se a e fai ‘upu i la‘u ‘au‘auna o Mose?”
9. ‘Ona tupu ai lea o le to‘asā o le ALI‘I ‘iā te i lā‘ua, ‘ua afio ‘ese fo‘i o ia.
10. ‘Ua mavae atu fo‘i le ao a‘i luma o le fale fetāfa‘i; fa‘auta fo‘i, ‘ua lepela Miriama e pei o le kiona lava; ‘ua va‘ai atu Arona ‘iā Miriama fa‘auta, ‘ua lepela lava o ia.
11. ‘Ona fai atu ai lea o Arona ‘iā Mose. “Auē! le ali‘i e, ‘ou te ‘ai‘oi atu ‘iā te oe, ‘aua ‘e te tu‘u ‘iā te i mā‘ua le agasala ‘ua ma faia ma le fa‘avalea, ma ‘ua ma agasala ai.
12. ‘Aua ne‘i ‘avea o ia e pei o sē ‘ua oti, o le ‘ua palagia le tasi itū o lona tino ‘ina o fānau mai i le manava o lona tinā.”
13. ‘Ona ‘alaga atu ai lea o Mose i le ALI‘I, ‘ua fa‘apea atu, “Le Atua e, ‘ou te ‘ai‘oi, atu ‘iā te oe ‘ia e fa‘amālōlō ‘iā te ia.”
14. ‘Ona fetalai mai ai lea o le ALI‘I ‘iā Mose, “‘Āfai ana feanu lona tamā i ona luma, po ‘ua lē ma ‘ea o ia i po e fitu? ‘Ia punitia o ia i tua o le toagalauapi i po e fitu, e mulimuli ane ‘ona toe talia mai ai lea o ia.”
15. ‘Ona punitia atu ai lea o Miriama i tua o le toagalauapi i po e fitu; e le‘i ō malaga fo‘i le nu‘u ‘ina se‘ia toe talia mai o Miriama.
16. E mulimuli ane ‘ona tu‘ua lea o Haserota e le nu‘u, ma latou tolauapi i le vao o Parana.