1. ‘Ua fai ‘upu Miriama ma Arona ‘iā Mose ‘ona o le fafine Kuso na ia fai avā ai; auā na fai avā o ia i le fafine Kuso.
2. ‘Ua la fai ane, “‘Ua na o Mose ‘ea ‘ua fetalai mai ai le ALI‘I? e lē o i mā‘ua fo‘i ‘ea ‘ua fetalai mai ai o ia?” ‘Ua fa‘afofoga mai fo‘i le ALI‘I.
3. (Na matuā agamalū lava le tagata nei o Mose, e sili lava i tagata uma o i le lalolagi.)
4. ‘Ona fetalai fa‘afuase‘i mai ai lea o le ALI‘I ‘iā Mose, ma Arona, ma Miriama, “‘Inā ō mai ia ‘outou e to‘atolu i le fale fetāfa‘i o le fa‘apotopotoga.” ‘Ona ō mai ai lea o i latou e to‘atolu.
5. ‘Ona afio ifo ai lea o le ALI‘I i le ao fa‘aniutū, ma ‘ua tu o ia i le faitoto‘a o le fale fetāfa‘i, ‘ua ia vala‘au fo‘i ‘iā Arona ma Miriama; ‘ona ō mai ai lea o i lā‘ua.
6. ‘Ona fetalai mai ai lea o ia, “‘Inā fa‘alogologo mai ia i a‘u ‘upu,‘Āfai e i ai se perofeta a le ALI‘I o ‘iā te ‘outou,‘ou te fa‘ailoa a‘u e a‘u ‘iā te ia i le fa‘aaliga,‘ou te tautala atu ‘iā te ia i le miti.
7. ‘Ae lē fa‘apea la‘u ‘au‘auna o Mose,o lē fa‘amaoni i lo‘u ‘āiga uma lava.
8. Ma te fa‘afesaga‘i ‘ona mā tautala ma ia, e fa‘aali lava,‘ae lē o ‘upu lilo; o le fa‘atusa fo‘i o le ALI‘I na te va‘ava‘ai i ai;na ‘oulua le fefefe ‘ea i se a e fai ‘upu i la‘u ‘au‘auna o Mose?”
9. ‘Ona tupu ai lea o le to‘asā o le ALI‘I ‘iā te i lā‘ua, ‘ua afio ‘ese fo‘i o ia.
10. ‘Ua mavae atu fo‘i le ao a‘i luma o le fale fetāfa‘i; fa‘auta fo‘i, ‘ua lepela Miriama e pei o le kiona lava; ‘ua va‘ai atu Arona ‘iā Miriama fa‘auta, ‘ua lepela lava o ia.