1. O le aso fo‘i e luafulu ma le fa o lea masina sa fa‘apotopotoina ai le fānauga a Isaraelu, ‘ua anapopogi ma lavalava ‘ie talatala, ma le ‘ele‘ele i luga ‘iā te i latou.
2. ‘Ona vavae‘eseina lea o le fānau a Isaraelu i tagata ‘ese uma ma ‘ua latou tutū ma ta‘u atu a latou agasala, ma amio leaga a o latou tamā.
3. ‘Ua latou tutū i luga i le mea na latou i ai, ma ‘ua latou faitau i le tusi o le tulafono a le ALI‘I lo latou Atua o le tasi ona vaega e fa o le aso; o le isi ona vaega e fa fo‘i ‘ua latou ta‘u atu a latou agasala, ma ifo atu i le ALI‘I lo latou Atua.
4. ‘Ona tutū lea i luga i le tulaga o sa Levī, o Iosua, ma Pani, o Katameeli, o Sepania, o Puni, o Serepeia, o Pani, ma Kanani, ‘ua latou ‘alalaga ma le leo tele i le ALI‘I lo latou Atua.
5. ‘Ona fa‘apea atu lea o sa Levī, o Iosua, ma Katameeli, o Pani, o Hasapenia, o Serepeia, o Hotia, o Sepania, ma Petakia,“‘Inā tutū ia ‘outou i luga,ma fa‘amanū atu i le ALI‘I lo ‘outou Atua mai le vavau e o‘o i le fa‘avavau.‘Ia fa‘amanūina lava lona suafa mamalu‘ua silisili i fa‘amanū ma vi‘iga uma.”
6. “O oe, na o oe lava o le ALI‘I;na e faia le lagi o le lagi o lagi,ma ‘au uma o i ai o le lalolagi ma mea uma o i ai.O le sami ma mea uma o i ai,‘ua e fa‘aola fo‘i ‘iā te i latou uma.‘Ua ifo fo‘i ‘iā te oe ‘au a le lagi.
7. O oe lava o le ALI‘I le Atua, o lē na filifilia Aperamo,ma ‘aumai ‘iā te ia a‘i Uro i Kaletaia,ma e fa‘aigoa ‘iā te ia i le igoa o Aperaamo.
8. Na e silafia fo‘i lona loto sa fa‘amaoni i ou luma,na e faia le feagaiga ma ia e foa‘i mai le nu‘u o sa Kananā.O sa Hetī, o sa Amorī, ma sa Perisē,ma sa Iepusē, ma sa Kirekasē,e foa‘i mai i lana fānau,e fa‘ataunu‘u fo‘i au afioga.Auā o oe o le amiotonu.
9. “Na e silafia fo‘i le puapuagā o matou tamā i Aikupito,na e fa‘afofogaina fo‘i la latou ‘alaga i le sami Ulaula.
10. Na e faia fo‘i fa‘ailoga ma vāvega ‘iā Farao,ma ana ‘au‘auna uma ma tagata uma o lona nu‘u,auā na e silafia ‘ua latou fa‘amaualuga ‘iā te i latou.Sa fa‘apea ‘ona e maua le vi‘iga e pei ‘ona fai i le aso nei.
11. Na e vavaeina fo‘i i o latou luma le sami,‘ia latou ui atu i totonu o le sami i le ‘iliti tai matūtū.A o ē na tuliloa ‘iā te i latou, na e lafoina i le loloto,e pei o se ma‘a i le sami sousou.
12. O le ao fa‘aniutū na e ta‘ita‘iina ai i latou i le ao,o le afi fa‘aniutū fo‘i i le po,e fa‘amalamalama a‘i ‘iā te i latou i le ala latou te ō atu ai.
13. Na e afio ifo fo‘i i luga i le mauga o Sinai,ma fetalai mā i latou mai le lagi,na e tu‘u mai fo‘i ‘iā te i latou fa‘amasinoga tonu,ma tulafono fa‘amaoni o sauniga ma poloa‘iga lelei.