1. ‘Ua uma ‘ona ati o le pā, ‘ua fa‘atūina fo‘i puipui, ‘ua tofia fo‘i leoleo faitoto‘a, ma ē pepese, ma sa Levī.
2. ‘Ona ‘ou tu‘uina atu lea ‘iā Hanani lo‘u uso, ma Hanania le ali‘i e pule i le ‘olo, e pule i Ierusalema; auā o le tagata fa‘amaoni, ‘ua sili fo‘i lona mata‘u i le Atua i lo le to‘atele.
3. ‘Ua ‘ou fai atu fo‘i ‘iā te i lā‘ua, “‘Aua ne‘i tatalaina faitoto‘a o Ierusalema se‘ia vevela le lā; ‘ia latou puipui fo‘i i faitoto‘a ma fa‘amau ai a o la tutū ai, ma ‘ia tofia leoleo o ē nonofo i Ierusalema, ta‘ito‘atasi i lona leoleoga, ta‘ito‘atasi fo‘i i lona lumāfale.”
4. ‘Ua valavala fo‘i le ‘a‘ai ma le lautele, a ‘ua to‘aitiiti tagata i ai, e le‘i faia fo‘i fale.
5. Na tu‘uina mai e lo‘u Atua i lo‘u loto e fa‘apotopoto i ali‘i, ma faipule, ma le nu‘u, ‘ina ‘ia tusigafaina i latou e tusa ma o latou tupuga. Na ‘ou maua fo‘i le tusi o gafa o ē na ō a‘e i le amataga, ‘ona ‘ou iloa lea o lo‘o tusia i ai, ‘ua fa‘apea.
6. O i latou nei o tagata o le itū mālō na ō a‘e ai le tāfeaga, o le tāfeaga lea na ‘avea e Nepukanesa le tupu o Papelonia, na latou toe fo‘i mai fo‘i i Ierusalema ma Iuta, ta‘itasi i lona ‘a‘ai.
7. O ē na ō mai ma Serupapelu; o Iosua, o Neemia, o Aseraia, o Raamia, o Naamani, o Moretekai, o Pilesana, o Mesepara, o Pikevai, o Nekuma, o Paana. O le faitau aofa‘i o tagata o le nu‘u o Isaraelu;
8. o le fānauga a Parose, e lua afe e to‘aselau e to‘afitugafulu ma le to‘alua.
9. O le fānauga a Sefatia, e tolu selau e to‘afitugafulu ma le to‘alua.