32. Na matou faia fo‘i mo i matou o tulafono e avatu e i matou i lea tausaga ma lea tausaga o lona vaetolugālemū o le sekeli mo le galuega o le fale o lo tatou Atua,
33. ma le areto e laulauina i luma, ma le taulaga i mea e ‘ai e lē aunoa, ma le taulaga mū e lē aunoa, o sapati, o masina fa‘ato‘ā va‘aia, ma tausamiga, ma mea pa‘ia, ma taulaga mo agasala e faia le togiola mo Isaraelu, ma sauniga uma o le fale o lo tatou Atua.
34. Na faia fo‘i e i matou le vili o ositaulaga, ma sa Levī, ma le nu‘u, i taulaga o fafie, a ‘aumai ai i le fale o lo tatou Atua, e āu i ‘āiga o tatou tamā, i aso ‘ua tofia i lea tausaga ma lea tausaga, e mū ai i le fatafaitaulaga o le ALI‘I lo tatou Atua e pei ‘ona tusia i le tulafono;
35. e ‘aumai fo‘i le fa‘apolopolo o lo tatou lau‘ele‘ele ma le fa‘apolopolo o fua uma o la‘au uma, i lea tausaga ma lea tausaga, i le fale o le ALI‘I.
36. O ulumatua fo‘i o tatou atali‘i, ma a tatou manu, e pei ‘ona tusia i le tulafono, o le mua‘i fānau o a tatou povi ma a tatou mamoe, e ‘aumai ai i le fale o lo tatou Atua, i ositaulaga o lo‘o ‘au‘auna i le fale o lo tatou Atua.
37. ‘Ia tatou ‘aumai fo‘i le fa‘apolopolo a tatou paluga falaoa, ma a tatou taulaga, ma fua o la‘au uma, o uaina, ma suāu‘u, i ositaulaga, i potu o le fale o lo tatou Atua; ma mea e sefulua‘i fua o lo tatou lau‘ele‘ele i sa Levī, ‘ia ‘iā te i latou o sa Levī lava o mea a sefulua‘i i ‘a‘ai uma tatou te galulue ai.
38. E i ai fo‘i le ositaulaga o le fānauga a Arona i sa Levī, pe a talia e sa Levī o mea e sefulua‘i mea; e ‘aumai fo‘i e sa Levī o mea e sefulua‘i le sefulu o mea i le fale o lo tatou Atua, i potu o le fale ‘oloa.
39. Auā e ‘aumai e le fānauga a Isaraelu ma le fānauga a Levī o taulaga o le saito, o le uaina ma le suāu‘u, i potu o i ai mea a le malumalu, ma ositaulaga o ē ‘au‘auna, ma leoleo faitoto‘a, ma ē ‘ua pepese.Tatou te lē tu‘ua lava le fale o lo tatou Atua.#