6. O le matā‘upu o le fa‘amaoni sa i lona gutu lea; na lē iloa fo‘i se mea lē tonu i ona laugutu; na sāvavali fa‘atasi ma a‘u i le amio filemū ma le amio sa‘o; na ia fa‘aliliuina fo‘i ē to‘atele nai le amioletonu.
7. Auā o laugutu o le ositaulaga e tausia ai le poto, latou te sā‘ilia fo‘i le tulafono a‘i lona gutu; auā o le sāvali o ia a le ALI‘I o ‘au.
8. A o ‘outou, ‘ua ‘outou ō ‘ese i le ala, ma ‘outou fa‘atausuai i ē to‘atele i le tulafono; ‘ua leaga ‘iā te ‘outou le feagaiga a Levi, ‘ua fetalai mai ai le ALI‘I o ‘au.
9. O a‘u fo‘i, ‘ua ‘ou tu‘uina atu ‘outou ‘ia ‘inosia ma ta‘ufa‘atauva‘aina ‘outou e le nu‘u uma, e pei ‘ona ‘outou lē tausi i o‘u ala ma ‘outou fa‘ailogaina tagata i le tulafono.
10. E lē ‘ua to‘atasi ‘ea le Tamā o i tatou uma lava. E lē faia ‘ea i tatou e le Atua e to‘atasi? Pe se a le mea ‘ua tatou fa‘a‘ole‘ole ai le tasi i le tasi i lo tatou soli o le feagaiga a o tatou tamā?
11. ‘Ua fa‘a‘ole‘ole Iuta, ‘ua faia fo‘i i Isaraelu ma Ierusalema le mea e ‘inosia; auā ‘ua solia e Iuta le mea ‘ua pa‘ia i le ALI‘I, o le mea ‘ua ia alofaina; ‘ua ia fai avā fo‘i i le afafine o le atua ‘ese.
12. E vavae‘eseina e le ALI‘I le tagata ‘ua faia lenā mea, o lē ‘ua mataala ma lē ‘ua tali atu ai fale ‘ie o Iakopo, ‘atoa ma lē ‘ua avatu le taulaga i le ALI‘I o ‘au.
13. ‘Ua atu lua ‘ona faia e ‘outou o lenei mea, o lo‘o liloia ai le fatafaitaulaga o le ALI‘I i loimata, o le tagi, ma le auega; o le mea lea ‘ua lē toe silafia ai la ‘outou taulaga, e le talileleia fo‘i mai o ‘outou lima.
14. A ‘ua ‘outou fai mai, “‘Ai se a fo‘i?” Auā o le ALI‘I, o ia ‘ua fai ma molimau ‘iā te oe ma lau avā sa e fai a o ē taule‘ale‘a, o le ‘ua e fa‘a‘ole‘ole i ai; a o ia sa lua mafuta, o le avā fo‘i o ia o lau feagaiga.