1. O le avega o le afioga a le ALI‘I ‘iā Isaraelu na ‘aumaia e Malaki.
2. ‘Ua ‘ou alofa atu ‘iā te ‘outou, ‘ua fetalai mai ai le ALI‘I. A ‘ua ‘outou fai mai, “‘Ua e alofa mai ‘iā i matou i ni a?”E le uso ‘ea Esau ma Iakapo? ‘ua fetalai mai ai le ALI‘I; a ‘ua ‘ou alofa ‘iā Iakopo,
3. ma ‘ou ‘ino‘ino ‘iā Esau; ‘ua faia fo‘i e a‘u ona mauga ma mea tu‘ufua, ‘ua faia fo‘i lona tofi ma fale i mea gaogao.
4. ‘Ua fai mai Etoma, “‘Ua fa‘atafunaina i matou, ‘ae matou te toe faia fale ‘ua māsofasofa;” o le mea lea, o lo‘o fa‘apea ‘ona fetalai mai ai o le ALI‘I o ‘au: Latou te faia, a o a‘u, ‘ou te lepetia, e ta‘ua i latou, O le lau‘ele‘ele o ē amio leaga ma le nu‘u e to‘asā i ai le ALI‘I e fa‘avavau.
5. E va‘ai fo‘i i ai o ‘outou lava mata, ‘ona ‘outou fa‘apea ai lea, “‘Ia vi‘ia le ALI‘I mai le lau‘ele‘ele o Isaraelu.”
6. E āva le atali‘i i lona tamā, e āva fo‘i le ‘au‘auna i lona ali‘i; ‘āfai o a‘u o le tamā, o ifea ni ‘ou āva? ‘āfai fo‘i o a‘u o le ali‘i, o ifea lo‘u mata‘utia? ‘ua fetalai mai ai le ALI‘I o ‘au ‘iā te ‘outou ositaulaga o ē ‘ino‘ino i lo‘u igoa; a ‘ua ‘outou fai mai: “‘Ua matou ‘ino‘ino i lou suafa i ni a?”
7. ‘Ua ‘ino‘ino ‘ina ‘ua ‘outou ‘aumai o mea e ‘ai ‘ua leaga i la‘u fatafaitaulaga; a ‘ua ‘outou fai mai, “‘Ua leaga oe ‘iā te i matou i ni a?” ‘Ua leaga ‘ina ‘ua ‘outou fai ane, o le la‘o‘ai a le ALI‘I, o le mea fa‘atauva‘a lava lea.
8. A ‘outou ‘aumaia le mea tauaso e fai ma taulaga, e lē leaga ‘ea? A ‘outou ‘aumaia le mea pipili ma le mea e ma‘i, e lē leaga ‘ea? Se‘i avatu ia i le ali‘i e pule ‘iā te oe; pe fiafia mai ‘ea o ia ‘iā te oe? pe talia mai oe e ia? ‘ua fetalai mai ai le ALI‘I o ‘au.
9. O lenei, ‘ia ‘outou ole atu i luma o le Atua ‘ina ‘ia alofa mai o ia ‘iā te i tatou; ‘ua tupu mai ‘iā te ‘outou lenei mea; pe na te talia mai ‘ea ‘outou? ‘ua fetalai mai ai le ALI‘I o ‘au.
10. O ai lava so ‘outou na te punitia fua faitoto‘a? Tou te lē tafu fua le afi i la‘u fatafaitaulaga; e leai lava so‘u fiafia ‘iā te ‘outou, ‘ua fetalai mai ai le ALI‘I o ‘au; ‘ou te lē talia fo‘i se taulaga a‘i o ‘outou lima.
11. Auā e fua mai i le mea e alu a‘e ai le lā, e o‘o i le mea e alu ifo ai, e vi‘ia ai lo‘u igoa i nu‘u ‘ese; e ‘aumaia fo‘i le mea manogi e mū i lo‘u igoa i nu‘u uma lava, ‘atoa ma le taulaga lelei; tāua e vi‘ia lo‘u igoa i nu‘u ‘ese, ‘ua fetalai mai ai le ALI‘I o ‘au.
12. A o ‘outou, ‘ua ‘outou fa‘aleagaina ai, ‘ina ‘ua ‘outou fai ane: ‘Ua leaga le la‘o‘ai a le ALI‘I; mōna fua, o ana mea e ‘ai lea, o le mea fa‘atauva‘a lava.
13. ‘Ua ‘outou fai ane fo‘i, “Auē, o le mea tigā na‘uā ma ‘outou ‘ino‘ino i ai,” ‘ua fetalai mai ai le ALI‘I o ‘au; ‘ua ‘outou ‘aumaia fo‘i le mea ‘ua faoa, ma le mea pipili, ma le mea e ma‘i; ‘ua ‘outou ‘aumai ai ma taulaga? ‘Ou te talia ‘ea lea mea ‘ai o ‘outou lima? ‘ua fetalai mai ai le ALI‘I.