13. E faia fo‘i e le ositaulaga se togiola mo ia ‘ona o lana agasala ‘ua ia agasala ai i se mea o ia mea, ‘ona fa‘amāgaloina ai lea o ia; o le falaoa ‘ua toe e faia lea ma le ositaulaga e pei o le taulaga i mea e ‘ai.
14. ‘Ua fetalai mai fo‘i le ALI‘I ‘iā Mose, ‘ua fa‘apea mai:
15. A soli tulafono e se tasi, ‘ua agasala fo‘i ma le sesē i mea pa‘ia a le ALI‘I; ‘ona ‘aumai ai lea e ia i le ALI‘I se mamoe po‘a e sao ‘ona lelei mai le lafu mamoe ‘ona o lona sesē, i lou lava fa‘atatau i sekeli ario, e tusa ma le sekeli o le malumalu, e fai ma taulaga mo le sesē;
16. na te taui atu fo‘i ‘ona o le mea ‘ua ia agasala ai i mea pa‘ia, ma fa‘aopoopo i ai e tusa ma lona vaega e lima, ma avatu ai i le ositaulaga; e faia fo‘i e le ositaulaga se togiola mo ia i le mamoe po‘a o le taulaga mo le sesē, ‘ona fa‘amāgaloina ai lea o ia.
17. ‘Āfai fo‘i e agasala se tasi, ‘ua faia fo‘i se mea e lē tusa ma poloa‘iga a le ALI‘I i mea uma e lē tusa ‘ona fai; e ui lava ‘ina lē iloa, e nofo sala lava ia, e ‘iā te ia fo‘i lana agasala.
18. Na te ‘aumai fo‘i i le ositaulaga se mamoe po‘a e sao ‘ona lelei mai le lafu mamoe, e tusa ma lou lava fa‘atatau, e fai ma taulaga mo le sesē; ‘ona fai ai lea e le ositaulaga se togiola mo ia ‘ona o le mea ‘ua ia sesē ai, ma na lē iloa, ‘ona fa‘amāgaloina ai lea o ia.
19. O le taulaga mo le sesē lea; ‘ua ia matuā sesē lava i luma o le ALI‘I.