11. E avatua fo‘i e Arona le povi po‘a ta‘anoa o le taulaga mo le agasala mo ia lava, ‘ona fai ai lea o le togiola mo ia lava, ‘atoa ma lona lava ‘āiga, na te fasi fo‘i le povi po‘a ta‘anoa o le taulaga mo le agasala mo ia lava.
12. E ‘ave fo‘i e ia le ipu e mū ai mea manogi, ‘ua tumu i le malala ‘a‘asa o le afi mai le fatafaitaulaga i luma o le ALI‘I, ma ona lima ‘ua tumu i mea manogi ‘ua tu‘inini‘ia, e ‘ave fo‘i e ia i tala atu o le ‘ie puipui.
13. Na te tu‘uina atu fo‘i le mea manogi i luga o le afi i luma o le ALI‘I, ‘ina ‘ia ufitia le nofoa o le alofa o i luga o le ‘atola‘au o le tulafono i le asu o le mea manogi, ne‘i oti lava ia.
14. E ‘ave fo‘i e ia nisi toto o le povi po‘a ta‘anoa, ma sausau ai i lona tamatama‘i lima i le nofoa o le alofa i lona itū i sasa‘e; na te sausau fa‘afitu fo‘i nisi toto i lona tamatama‘i lima i luma o le nofoa o le alofa.
15. ‘Ona fasi ai lea e ia o le ‘oti o le taulaga mo le agasala, mo le nu‘u lea, ma ‘ave lona toto i tala atu o le ‘ie puipui, e fai fo‘i i lea toto e pei ‘ona ia faia i le toto o le povi po‘a ta‘anoa, e sausau ai fo‘i i luga o le nofoa o le alofa, ma luma o le nofoa o le alofa.
16. Na te faia fo‘i se togiola mo le mea pa‘ia, ‘ona o le leaga o le fānauga a Isaraelu, ‘ona o latou solitulafono fo‘i ‘iā latou agasala uma e fa‘apea fo‘i ‘ona faia e ia mo le fale fetāfa‘i o le fa‘apotopotoga, o lo‘o tumau ‘iā te i latou i o latou leaga.
17. ‘Aua ne‘i i ai se tagata i le fale fetāfa‘i o le fa‘apotopotoga pe a ulufale o ia i le mea pa‘ia e fai ai le togiola, ‘ina se‘ia ulufafo ia, se‘ia uma fo‘i ‘ona faia e ia le togiola mo ia, ‘atoa ma lona ‘āiga, ‘atoa fo‘i ma le fa‘apotopotoga uma o Isaraelu.
18. E alu fo‘i o ia i fafo i le fatafaitaulaga o i luma o le ALI‘I e fai ai le togiola mo le fata na te ‘ave fo‘i nisi toto o le povi po‘a ta‘anoa, ‘atoa ma nisi toto o le ‘oti, ma tu‘u ai i nifo o le fatafaitaulaga ‘ia so‘o ai.
19. Na te sausau fa‘afitu i ona luga nisi toto i lona tamatama‘i lima e fa‘amamāina ai, ma fa‘apa‘iaina ai, a‘i le leaga o le fānauga a Isaraelu.
20. A uma fo‘i ‘ona faia e ia o le togiola mo le mea pa‘ia, ma le fale fetāfa‘i o le fa‘apotopotoga, ma le fatafaitaulaga, ‘ona ‘aumai ai lea o le ‘oti ola;
21. e fa‘ae‘e fo‘i e Arona ona lima e lua i le ulu o le ‘oti ola, ma fa‘aali i ona luga o amio leaga uma a le fānauga a Isaraelu, ma o latou solitulafono uma ‘iā latou agasala uma, o lo‘o fa‘ae‘e ai i le ulu o le ‘oti, ‘ona tu‘u atu ai lea o le ‘oti i le lima o le tagata ‘ua saunia e ‘ave i le vao.
22. E ‘ave fo‘i e le ‘oti i ona luga a latou amio leaga uma i le nu‘u e lē ‘ainā, na te tu‘ua fo‘i le ‘oti e alu i le vao.