1. ‘Ua fetalai mai fo‘i le ALI‘I ‘iā Mose, ‘ina ‘ua uma ‘ona oti o atali‘i e to‘alua o Arona, na la ositaulaga i luma o le ALI‘I, ma oti ai i lā‘ua.
2. ‘Ua fetalai mai le ALI‘I ‘iā Mose:‘Inā fai ane ia ‘iā Arona lou uso, ‘aua ne‘i ulufale o ia i aso faiso‘o i le mea pa‘ia i tala atu o le ‘ie puipui, i luma o le nofoa o le alofa ‘ua i luga o le ‘atola‘au; ‘ina ne‘i oti ai o ia, ‘aua e fa‘aali a‘u i le ao i luga ‘ae o le nofoa o le alofa.
3. E fa‘apea ‘ona ulufale o Arona i le mea pa‘ia, na te avatua se povi po‘a ta‘anoa e fai ma taulaga mo le agasala, ma se mamoe po‘a e fai ma taulaga mū.