1. ‘Ua fetalai mai fo‘i le ALI‘I ‘iā Mose, ‘ina ‘ua uma ‘ona oti o atali‘i e to‘alua o Arona, na la ositaulaga i luma o le ALI‘I, ma oti ai i lā‘ua.
2. ‘Ua fetalai mai le ALI‘I ‘iā Mose:‘Inā fai ane ia ‘iā Arona lou uso, ‘aua ne‘i ulufale o ia i aso faiso‘o i le mea pa‘ia i tala atu o le ‘ie puipui, i luma o le nofoa o le alofa ‘ua i luga o le ‘atola‘au; ‘ina ne‘i oti ai o ia, ‘aua e fa‘aali a‘u i le ao i luga ‘ae o le nofoa o le alofa.
3. E fa‘apea ‘ona ulufale o Arona i le mea pa‘ia, na te avatua se povi po‘a ta‘anoa e fai ma taulaga mo le agasala, ma se mamoe po‘a e fai ma taulaga mū.
4. E ‘ofu o ia i le ‘ofu tino o le ‘ie vavae e pa‘ia, e ‘ofu fo‘i lona tino i le ‘ofuvae o le ‘ie vavae, e fusia fo‘i lona sulugātiti i le fusi o le ‘ie vavae, ma le pulou o le ‘ie vavae e pulou ai o ia; o ‘ofu pa‘ia ia, o le mea lea na te tā‘ele ai lona tino i le vai, i le ‘ofu ai o ia.
5. Na te talia fo‘i ai le fa‘apotopotoga o le fānauga a Isaraelu ‘oti po‘a e lua e fai ma taulaga mo le agasala, ma se mamoe po‘a e tasi e fai ma taulaga mū.
6. E avatua fo‘i e Arona lana povi po‘a ta‘anoa e fai ma taulaga mo le agasala mo ia lava; ‘ona fai ai lea o le togiola mo ia lava ‘atoa ma lona lava ‘āiga.
7. E ‘ave fo‘i e ia o ‘oti e lua, ma tu‘u atu ai i luma o le ALI‘I i le faitoto‘a o le fale fetāfa‘i o le fa‘apotopotoga.
8. ‘Ona faia lea e Arona o vili i ‘oti ia e lua; o le tasi vili ma le ALI‘I, o le tasi fo‘i vili mā le ‘oti o le a tu‘u atu e alu.
9. E avatua fo‘i e Arona le ‘oti na fa‘asaga i ai le vili a le ALI‘I, ma fai a‘i le taulaga mo le agasala.
10. A o le ‘oti na fa‘asaga i ai le vili o le ‘oti o le a tu‘u atu e alu, e tu‘uina atu ola lea i luma o le ALI‘I, e fai a‘i le togiola, e tu‘u atu ai e fai ma ‘oti e alu i le vao.
11. E avatua fo‘i e Arona le povi po‘a ta‘anoa o le taulaga mo le agasala mo ia lava, ‘ona fai ai lea o le togiola mo ia lava, ‘atoa ma lona lava ‘āiga, na te fasi fo‘i le povi po‘a ta‘anoa o le taulaga mo le agasala mo ia lava.
12. E ‘ave fo‘i e ia le ipu e mū ai mea manogi, ‘ua tumu i le malala ‘a‘asa o le afi mai le fatafaitaulaga i luma o le ALI‘I, ma ona lima ‘ua tumu i mea manogi ‘ua tu‘inini‘ia, e ‘ave fo‘i e ia i tala atu o le ‘ie puipui.
13. Na te tu‘uina atu fo‘i le mea manogi i luga o le afi i luma o le ALI‘I, ‘ina ‘ia ufitia le nofoa o le alofa o i luga o le ‘atola‘au o le tulafono i le asu o le mea manogi, ne‘i oti lava ia.