16. O le iaena, ma le teemesa, ma le saape, ma le nesa, ma manu e uiga fa‘atasi i ai.
17. O le kusa, ma le saleka, ma le inesope,
18. ma le tanisamiti, ma le kati, ma le raama,
19. ma le kasita, ma le matu‘u, ma manu e uiga fa‘atasi i ai; o le tukapiti ma le pe‘a.
20. O mea uma felelei e fetolofi, o lo‘o fetolofi i vae e ta‘ifā, e ‘avea ia ma mea e ‘inosia ‘iā te ‘outou.
21. Na o mea ia tou te ‘a‘ai ai i mea fetolofi uma ‘ua felelei, o mea uma e fetolofi i vae ta‘ifā, ‘ua fa‘asilisili nisi vae, e oso ai i le ‘ele‘ele;
22. o mea nei o ia mea tou te ‘a‘ai ai; o le sē akerise, ma mea e uiga fa‘atasi i ai; ma le sē solome, ma mea o uiga fa‘atasi i ai; ma le sē akoli, ma mea e uiga fa‘atasi i ai; ma le sē ‘akava, ma mea e uiga fa‘atasi i ai.
23. A o mea uma e felelei fetolofi i vae ta‘ifā, e ‘avea ia ma mea e ‘inosia ‘iā te ‘outou.
24. O mea ia e leaga ai ‘outou, ai se pa‘i atu i se mea mate o ia mea, e leaga o ia se‘ia o‘o i le afiafi.