10. ‘ina ‘ia ‘outou fa‘ailogaina mea pa‘ia ma mea e lē pa‘ia, o mea leaga fo‘i ma mea mamā;
11. ma ‘ia ‘outou a‘oa‘o atu ai i le fānauga a Isaraelu i tulafono uma ‘ua fetalai mai ai le ALI‘I ‘iā i latou ‘ua ‘aumaia e Mose.
12. ‘Ona fai atu ai lea o Mose ‘iā Arona, ma Eleasaro, ma Itamaro o ona atali‘i ‘ua totoe: ‘Ia ‘outou ‘ave le taulaga i mea e ‘ai ‘ua toe i le taulaga e fai i le ALI‘I i le afi ma ‘a‘ai ai ma areto e lē fa‘afefeteina i tafatafa o le fatafaitaulaga; auā o le mea lea e sili ‘ona pa‘ia.
13. Tou te ‘a‘ai ai lava i le mea pa‘ia, auā o lou tufa‘aga lea, ma le tufa‘aga o ou atali‘i o le taulaga e fai i le ALI‘I i le afi auā ‘ua fa‘apea ‘ona poloa‘i mai ai ‘iā te a‘u.
14. O le fatafata fo‘i e lūlū, ma le ālagalima e si‘i, tou te ‘a‘ai ai i se mea mamā, o oe ma ou atali‘i, ma ou afafine fa‘atasi ma oe; auā o ou tufa‘aga ia, ma tufa‘aga o ou atali‘i, na tu‘uina atu ‘iā te ‘outou i taulaga fa‘afetai a le fānauga a Isaraelu.
15. O le ālagalima e si‘i ma le fatafata e lūlū, latou te ‘aumai ai fa‘atasi ma taulaga e fai i le afi i ga‘o, e lūlū ai, o le taulaga lūlū lea i luma o le ALI‘I; e ‘iā te oe lava lea ma ou atali‘i fa‘atasi ma oe, o le tulafono e fa‘avavau; pei ‘ona poloa‘i mai ai o le ALI‘I.
16. ‘Ua matuā sā‘ili fo‘i e Mose le ‘oti o le taulaga mo le agasala, fa‘auta fo‘i, ‘ua susunuina; ‘ona ita ai lea o ia ‘iā Eleasaro ma Itamaro, o atali‘i ia o Arona o totoe, ‘ua fa‘apea atu ai,
17. “O le a le mea ‘ua ‘outou le ‘a‘ai ai le taulaga mo le agasala i le mea pa‘ia, auā e sili ‘ona pa‘ia ia, ‘ua tu‘uina atu ai ‘iā te ‘outou, ‘ina ‘ia fa‘amāgaloina ai le agasala a le fa‘apotopotoga, e fai ai le togiola mo i latou i luma o le ALI‘I?
18. Fa‘auta mai, ‘ua lē ‘aumaia lava lona toto i totonu o le mea pa‘ia; ana ‘outou ‘a‘ai ai i le mea pa‘ia po ‘ua tatau ai, e pei ‘ona ‘ou fai atu ai.”
19. ‘Ona fai mai ai lea o Arona ‘iā Mose, “Fa‘auta mai, na avatua e i lā‘ua i le aso nei la la taulaga mo le agasala, ma la la taulaga mū i luma o le ALI‘I; ‘ua o‘o mai fo‘i ‘iā te a‘u mea fa‘apea; ana ‘ou ‘ai i le taulaga mo le agasala i le asō, e talia ‘ea i luma o le ALI‘I?”
20. ‘Ua fa‘alogo ai fo‘i Mose, ‘ona loto malie ai lea o ia.