1. O Natapu fo‘i ma Aviu, o atali‘i o Arona, ‘ua ta‘itasi ma ‘ave lana ipu e fa‘amū ai mea manogi, ma tu‘u ai le afi, ma tu‘u mea manogi i ona luga, ma avatu ai le afi ‘ese i luma o le ALI‘I, na ia lē poloa‘i mai ai ‘iā te i lā‘ua.
2. ‘Ona alu ane ai lea o le afi mai luma o le ALI‘I, ‘ua mū ai i lā‘ua, ‘ona la oti ai lea i luma o le ALI‘I.
3. ‘Ona fai atu ai lea o Mose ‘iā Arona, “O le mea lenei ‘ua fetalai mai ai le ALI‘I, ‘ua fa‘apea mai,‘E fa‘apa‘iaina lava a‘u e i latou uma o ē fa‘alatalata mai ‘iā te a‘u;e mamalu fo‘i a‘u i luma o le nu‘u uma;’”‘ona fa‘alologo ai lea o Arona.
4. ‘Ua vala‘au atu fo‘i Mose ‘iā Mesalu ma Elisafano, o atali‘i o Usialu, o le uso o le tamā o Arona, ‘ua fa‘apea atu ‘iā i lā‘ua, “‘Inā fa‘alatalata mai ia, ‘inā ‘ave ‘ese ia o ‘oulua uso i luma o le mea pa‘ia ‘ae ‘ave i tua o le toagalauapi.”
5. ‘Ona la fa‘alatalata atu ai lea, ma la ‘ave ‘iā te i lā‘ua i o la ‘ofu tino i tua o le toagalauapi, e pei ‘ona fai atu ai o Mose.
6. ‘Ona fai atu ai lea o Mose ‘iā Arona ma Eleasaro, ma Itamaro ona atali‘i, “‘Aua tou te tō ‘ese o ‘outou pulou; ‘aua ne‘i tou saeia fo‘i o ‘outou ‘ofu, ‘ina ne‘i oti ai ‘outou, ‘ina ne‘i o‘o mai ai le to‘asā i le fa‘apotopotoga uma; a ‘ia fētāgisi o ‘outou uso, o le ‘āiga uma o Isaraelu, ‘ona o le mū ‘ua fa‘amūina ai e le ALI‘I.
7. ‘Aua fo‘i tou te ō ‘ese i le faitoto‘a o le fale fetāfa‘i o le fa‘apotopotoga, ‘ina ne‘i oti ai ‘outou; auā o le u‘u o le ALI‘I e u‘u a‘i o lo‘o i luga ‘iā te ‘outou.” ‘Ona latou fai ai lea e tusa ma le ‘upu a Mose.
8. ‘Ua fetalai mai le ALI‘I ‘iā Arona, ‘ua fa‘apea mai:
9. ‘Aua ‘e te inu le uaina po o le ‘ava, o oe lava, po o ou atali‘i, pe a ‘outou ō i totonu o le fale fetāfa‘i o le fa‘apotopotoga, ne‘i oti ai ‘outou; o le tulafono lea e fa‘avavau i o ‘outou tupulaga amulī;
10. ‘ina ‘ia ‘outou fa‘ailogaina mea pa‘ia ma mea e lē pa‘ia, o mea leaga fo‘i ma mea mamā;
11. ma ‘ia ‘outou a‘oa‘o atu ai i le fānauga a Isaraelu i tulafono uma ‘ua fetalai mai ai le ALI‘I ‘iā i latou ‘ua ‘aumaia e Mose.
12. ‘Ona fai atu ai lea o Mose ‘iā Arona, ma Eleasaro, ma Itamaro o ona atali‘i ‘ua totoe: ‘Ia ‘outou ‘ave le taulaga i mea e ‘ai ‘ua toe i le taulaga e fai i le ALI‘I i le afi ma ‘a‘ai ai ma areto e lē fa‘afefeteina i tafatafa o le fatafaitaulaga; auā o le mea lea e sili ‘ona pa‘ia.
13. Tou te ‘a‘ai ai lava i le mea pa‘ia, auā o lou tufa‘aga lea, ma le tufa‘aga o ou atali‘i o le taulaga e fai i le ALI‘I i le afi auā ‘ua fa‘apea ‘ona poloa‘i mai ai ‘iā te a‘u.
14. O le fatafata fo‘i e lūlū, ma le ālagalima e si‘i, tou te ‘a‘ai ai i se mea mamā, o oe ma ou atali‘i, ma ou afafine fa‘atasi ma oe; auā o ou tufa‘aga ia, ma tufa‘aga o ou atali‘i, na tu‘uina atu ‘iā te ‘outou i taulaga fa‘afetai a le fānauga a Isaraelu.