1. O a‘u fo‘i o le tagata ‘augavale, e tusa ma tagata uma,‘ua ‘ou tupu mai i le ulua‘i tagata na faia o ia i le ‘ele‘ele;‘ua gaosia lo‘u tino i le manava o lo‘u tinā;
2. e tusa ma masina e sefulu ‘ua fa‘ato‘aina ai a‘u i le toto,i le galuega a le tino o le tagata, i le filemū o le itūpō e moe ai.
3. ‘Ua fānau lava a‘u, ‘ona ‘ou mānava ai fo‘i lea i le ‘ea faitele;‘ua fa‘apa‘ūina o a‘u i le ‘ele‘ele e tasi e pei fo‘i o isi tagata;o le tagi lava na ‘ou mua‘i si‘i ai lo‘u leo.
4. O le ‘ie lava na aui ai a‘u ma ‘ua tausia ai a‘u ma le alofa tele.
5. Auā e leai se tupu na lē fa‘apea lava le amataga o lona ola.
6. ‘Ua tasi la le ala e ulu mai ai tagata uma i le ola,e tasi fo‘i le ala e mavae ‘ese ai.
7. O le mea lea ‘ua ‘ou naunau ai i le atamai ma ‘ua foa‘iina mai lava ‘iā te a‘u;‘ua ‘ou tagi atu i le Atua ma ‘ua sau ‘iā te a‘u le agaga o le poto.
8. ‘Ua ‘ou fa‘asilia ia i mālō uma ma nofoāli‘i,‘ua ‘ou tāofi ifo e leai lava se ‘oloa pe a fa‘atatau ‘iā te ia.
9. ‘Ua ‘ou lē fa‘atusaina fo‘i ma ia o ma‘a tāua,auā o auro uma o le lalolagi o oneone fa‘atauva‘a pe a fa‘atatauina ma le poto,o le ario fo‘i ‘ua tusa ma le palapala i ona luma.
10. Na ‘ou fa‘asili lo‘u alofa i ai i lo‘u mana‘o i le tino malosi ma le ‘auleleima ‘ua tonu ‘iā te a‘u e ‘avea o ia mo‘u malamalama,auā o lona malamalama e lē au tineia.
11. A ‘ua ō mai o mea lelei uma ‘iā te a‘u fa‘atasi ma ia,‘ua ‘ou talia ni ‘oloa e lē mafaitaulia nai ona lima.
12. Ma ‘ua ‘ou ‘oli‘oli i mea uma, auā o le poto lenā sa savali pea i o‘u luma,sa ‘ou lē iloa fo‘i o ia lava o le tinā o mea lelei uma ia.
13. Na ‘ou a‘oa‘o le poto ma le loto ‘ua sa‘o,‘ou te foa‘i atu fo‘i e aunoa ma se matau‘a,‘ou te lē nanā lona mau‘oloa.
14. Auā o ia o le tu‘ugā‘oloa mo tagata,e lē āu fa‘aumatia lava ia; o ē ‘ua latou fa‘aaogāina,‘ua mautufa‘aga ai i latou i le alofa fa‘auō o le Atua,‘ua ta‘uleleia i ona luma ‘ona o tu lelei na a‘oa‘oina ai i latou.