21. O atali‘i fo‘i o Peniamina; o Pela, ma Pekaru, ma Asepelu, o Kira, ma Naamanu, o Aki, ma Rose, o Mepimu, ma Hupimo, ‘atoa ma Aratu.
22. O tama tane ia a Rasela na ia fānau ‘iā Iakopo, o i latou ‘atoa o tagata e to‘atinoagafulu ma le to‘afa.
23. O le atali‘i fo‘i o Tanu; o Husimo.
24. O atali‘i o Nafatali, o Iasielu, ma Kuni, ma Iesaru, ‘atoa ma Selimo.
25. O tama nei a Pila, o lē na avatua e Lapana i lona afafine o Rasela, na ia fānau mai i latou ‘iā Iakopo, o ona ‘atoa ia o tama e to‘afitu.
26. O tagata uma na ō mai ma Iakopo i Aikupito, ē na tutupu, mai ‘iā te ia, ‘ae lē faitaulia avā a atali‘i o Iakopo, o ona ‘atoa o tagata uma e to‘aonogafulu ma le to‘aono.
27. O atali‘i o Iosefa ē na fānau ‘iā te ia i Aikupito, o tama e to‘alua; o tagata ‘atoa uma o le ‘āiga o Iakopo ē na ō mai i Aikupito e to‘afitugafulu lava i latou.
28. ‘Ua ia ‘auina atu fo‘i Iuta e muamua atu ‘iā te ia ‘iā Iosefa, ‘ina fa‘asino e ia ‘iā te ia o Kosena; ‘ona o‘o atu lea o i latou i le lau‘ele‘ele o Kosena.
29. ‘Ona sauni lea e Iosefa o lona nofoa fa‘ata‘avalevale, ‘ua alu a‘e fo‘i i Kosena la te fetaia‘i ai ma lona tamā o Isaraelu; ‘ua na iloa atu ‘iā te ia, ona fusi ai lea ‘iā te ia ma tagi pea lava i lona ua.
30. ‘Ona fai atu lea o Isaraelu ‘iā Iosefa, “‘Ia a‘u oti nei lava, ‘ina ‘ua ‘ou iloa atu e o‘u mata, auā ‘ua e ola pea lava.”
31. ‘Ona fai atu lea o Iosefa i ona uso ma le ‘āiga o lona tamā, “‘Ou te alu a‘e ma ‘ou ta‘u atu ‘iā Farao, ‘ou te fai atu ‘iā te ia, ‘‘Ua ō mai ‘iā te a‘u o‘u uso ma le ‘āiga o lo‘u tamā o ē sa i le nu‘u o Kanana;
32. o leoleo mamoe i latou, auā o tagata faga manu i latou; ‘ua ‘aumai a latou lafu mamoe, ma a latou povi, ma mea uma lava o lo‘o ‘iā i latou.’
33. A ‘a‘ami mai fo‘i Farao ‘iā te ‘outou, ma fesili ‘iā te ‘outou, ‘Se a lo ‘outou faiva?’
34. ‘Ona ‘outou fai atu ai lea, ‘O tagata faga manu au ‘au‘auna talu ‘ina o taulele‘a i matou ‘ua o‘o mai i ona po nei, o i matou ‘atoa ma o matou tamā;’ tou te fa‘apea atu, ‘ina ‘ia nofo ‘outou i le lau‘ele‘ele o Kosena; auā ‘ua ‘inosia lava e le nu‘u o Aikupito o leoleo mamoe uma lava.”#