8. ‘Ona la tali mai ai lea ‘iā te ia, “‘Ua fai a ma miti, ‘ae leai sē na te fa‘amatalaina mai.”‘Ona fai atu ai lea o Iosefa ‘iā te i lā‘ua, “E lē o i le Atua ‘ea fa‘amatalaga? ‘inā tala mai ia ‘iā te a‘u.”
9. ‘Ona tala mai ai lea e lē ‘ua sili i ē tautū uaina o lana miti ‘iā Iosefa, ‘ua fa‘apea mai ‘iā te ia, “O la‘u miti, fa‘auta, sa i o‘u luma le vine.
10. Na i ai fo‘i i le vine o la e tolu, e peiseaī ‘ua fotu mai fo‘i ia ‘ua tutupu mai ona fuga, ‘ua fua mai fo‘i ona fuifui o vine pula.
11. Na i lo‘u lima fo‘i le ipu a Farao, na ‘ou tago fo‘i i vine ma a‘u taulia i le ipu a Farao, ‘ona ‘ou tu‘u atu ai lea o le ipu i le ‘a‘ao o Farao.”
12. ‘Ona fai atu ai lea o Iosefa ‘iā te ia:“O lona fa‘amatalaga lenei; o la e tolu e tolu ‘ia aso.
13. A o le‘i mavae aso e tolu, ‘ona fa‘aea lea e Farao i lou ulu, ma toe tofia oe i lou faiva, ‘e te tu‘u atu ai fo‘i le ipu a Farao i lona ‘a‘ao, fa‘apei o anamua ‘ina o ē tautū uaina ‘iā te ia,
14. A ‘ia e manatua mai a‘u pe a o‘o le manuia ‘iā te oe ma ‘ia e alofa mai ‘iā te a‘u, ma ‘ia e ta‘ua a‘u ‘iā Farao ma ‘ia ‘aveina atu a‘u i lenei fale;
15. auā na gaoia mai lava a‘u ai le nu‘u o Eperu; ‘ou te le‘i faia fo‘i ‘i‘inei se mea e tasi e tatau ai ‘ona ‘ia latou tu‘uina o a‘u i le lua.”
16. ‘Ua iloa e lē ‘ua sili i ē fai mea e ‘ai ‘ua lelei le fa‘amatalaga, ‘ona fai mai ai lea o ia ‘iā Iosefa, “O a‘u fo‘i na ‘ou iloa i la‘u miti, fa‘auta, na fa‘ae‘e ‘ato mea e ‘ai sinasina e tolu i lo‘u ulu,
17. na i ai fo‘i i le ‘ato aupitoaluga mea e ‘ai ‘ese‘ese ‘ua tao mā Farao; na ‘a‘ai ai fo‘i manu felelei i le ‘ato na i luga o lo‘u ulu.”
18. ‘Ona tali atu ai lea o Iosefa, ‘ua fa‘apea atu:“O lona fa‘amatalaga lenei; o ‘ato e tolu e tolu ia aso.
19. A o le‘i mavae aso e tolu ‘ona ‘ava‘e ai lea e Farao o lou ulu mai ‘iā te oe, na te fa‘atautau fo‘i ‘iā te oe i luga o se la‘au; ‘ona ‘a‘ai ai lea o manu felelei i lou tino.”