4. ‘Ua tu‘uina atu i lā‘ua i le ali‘i e pule i le ‘au e fa‘afeao ‘iā Iosefa, ‘ua ia ‘au‘auna atu ai ‘iā te i lā‘ua. Na la i ai fo‘i isi aso i le fale puipui.
5. ‘Ona fai ai lea o a la miti, o le tagata ma lana miti i le po e tasi, e ta‘itasi e tusa ma le fa‘amatalaga o lana miti, o le tautū uaina ‘atoa ma le fai mea e ‘ai a le tupu o Aikupito, ē na noanoatia i le fale puipui.
6. ‘Ua ulufale atu Iosefa ‘iā te i lā‘ua i le taeao, ‘ua va‘ai atu i ai, fa‘auta, ‘ua la fa‘anoanoa.
7. ‘Ona fesili atu ai lea o ia i ‘au‘auna a Farao na puipuia ma ia i le fale o lona ali‘i, ‘ua fa‘apea atu ai, “Se a le mea e fa‘anoanoa ai ‘oulua i le aso nei”
8. ‘Ona la tali mai ai lea ‘iā te ia, “‘Ua fai a ma miti, ‘ae leai sē na te fa‘amatalaina mai.”‘Ona fai atu ai lea o Iosefa ‘iā te i lā‘ua, “E lē o i le Atua ‘ea fa‘amatalaga? ‘inā tala mai ia ‘iā te a‘u.”
9. ‘Ona tala mai ai lea e lē ‘ua sili i ē tautū uaina o lana miti ‘iā Iosefa, ‘ua fa‘apea mai ‘iā te ia, “O la‘u miti, fa‘auta, sa i o‘u luma le vine.
10. Na i ai fo‘i i le vine o la e tolu, e peiseaī ‘ua fotu mai fo‘i ia ‘ua tutupu mai ona fuga, ‘ua fua mai fo‘i ona fuifui o vine pula.
11. Na i lo‘u lima fo‘i le ipu a Farao, na ‘ou tago fo‘i i vine ma a‘u taulia i le ipu a Farao, ‘ona ‘ou tu‘u atu ai lea o le ipu i le ‘a‘ao o Farao.”