1. ‘Ua mavae na mea, ‘ona amio leaga lea o le tautū uaina a le tupu o Aikupito ‘atoa ma lē na fai ana mea e ‘ai, i lo lā‘ua ali‘i le tupu o Aikupito.
2. ‘Ona ita ai lea o Farao i le to‘alua o ana ‘au‘auna, o lē ‘ua sili i ē tautū uaina ma lē ‘ua sili i ē fai mea e ‘ai.
3. ‘Ua na tu‘u atu ‘iā te i lā‘ua ‘ia leoleoina i le fale o le ali‘i pule i le ‘au e fa‘afeao, i le fale puipui, o le mea ‘ua noanoatia ai Iosefa.
4. ‘Ua tu‘uina atu i lā‘ua i le ali‘i e pule i le ‘au e fa‘afeao ‘iā Iosefa, ‘ua ia ‘au‘auna atu ai ‘iā te i lā‘ua. Na la i ai fo‘i isi aso i le fale puipui.
5. ‘Ona fai ai lea o a la miti, o le tagata ma lana miti i le po e tasi, e ta‘itasi e tusa ma le fa‘amatalaga o lana miti, o le tautū uaina ‘atoa ma le fai mea e ‘ai a le tupu o Aikupito, ē na noanoatia i le fale puipui.
6. ‘Ua ulufale atu Iosefa ‘iā te i lā‘ua i le taeao, ‘ua va‘ai atu i ai, fa‘auta, ‘ua la fa‘anoanoa.
7. ‘Ona fesili atu ai lea o ia i ‘au‘auna a Farao na puipuia ma ia i le fale o lona ali‘i, ‘ua fa‘apea atu ai, “Se a le mea e fa‘anoanoa ai ‘oulua i le aso nei”
8. ‘Ona la tali mai ai lea ‘iā te ia, “‘Ua fai a ma miti, ‘ae leai sē na te fa‘amatalaina mai.”‘Ona fai atu ai lea o Iosefa ‘iā te i lā‘ua, “E lē o i le Atua ‘ea fa‘amatalaga? ‘inā tala mai ia ‘iā te a‘u.”