10. ‘Ona tali atu lea o Iakopo, “‘Aua lava, ‘āfai ‘e te alofa mai ‘iā te a‘u, ‘ia e talia mai lava la‘u mea alofa; auā o lenei, ‘ua ‘ou iloa atu ou fofoga, e peiseaī ‘ua ‘ou iloa atu fofoga o le Atua ma ‘ua e finagalo malie mai ‘iā te a‘u.
11. ‘Ia e talia lava lo‘u alofa ‘ua avatu nei ‘iā te oe; auā ‘ua alofaina a‘u e le Atua, auā fo‘i ‘ua iā te a‘u mea uma.” ‘Ua ia u‘una‘i atu ‘iā te ia, ‘ona talia lea e ia.
12. ‘Ona fa‘apea mai lea o Esau, “Se‘i sauni la tatou malaga, ‘ina tatou ō ia, ‘ou te muamua fo‘i ‘iā te oe.”
13. ‘Ona tali atu lea o ia, “‘Ua silafia e lo‘u ali‘i ‘ua fa‘alēlava le fānau, o lafu mamoe fo‘i ma lafu povi ma a latou tama, ‘ua ‘iā te a‘u ia; ‘āfai fo‘i e tulituliteteleina i latou i le aso e tasi, ‘ona mamate ai lea o le lafu uma.
14. ‘Ia maliu atu lava lo‘u ali‘i e muamua i lana ‘au‘auna; a o a‘u, ‘ou te savali lemū e fa‘atatau i manu e muamua ‘iā te a‘u, ‘atoa ma le fānau, se‘ia ‘ou o‘o atu i lo‘u ali‘i i Seira.”
15. ‘Ona fa‘apea mai lea o Esau, “Se‘i ‘ou tu‘uina atu ‘iā te oe ni o matou tagata nei.”‘Ona tali atu lea o ia, “‘Ai se a fo‘i? ‘Ia alofaina a‘u e lo‘u ali‘i.”
16. ‘Ona toe fo‘i atu lea o Esau i lea aso i lana malaga i Seira.
17. ‘Ua alu atu fo‘i Iakopo i Sukota, ‘ua fai ai fo‘i lona fale, ‘ua fai ai fo‘i fale apitaga o ana manu; o le mea lea na fa‘aigoaina ai lea mea o Sukota.
18. ‘Ua saogalemū atu fo‘i Iakopo i le ‘a‘ai o Sekema, o i le nu‘u o Kanana lea, ‘ina ‘ua sau o ia mai Patanarama; ‘ua ia fa‘atūina fo‘i lona fale ‘ie i luma o le ‘a‘ai.
19. ‘Ua ia fa‘atau fo‘i se fasi fanua i le mea sa fa‘atūina ai e ia lona fale ‘ie, nai le fānauga a Hamoro, le tamā o Sekema, i ni tupe e selau.